Ray Online｜梁振英70歲生日寫長文 稱不做非執董及投資全力做公務
全國政協副主席、前行政長官梁振英噚日迎嚟70歲大壽，佢喺社交網站以「感恩父母，效力祖國」為題寫咗篇長文，話為咗一日比一日好嘅國家民族，要用今日比聽日好嘅身體繼續拼搏。
梁振英數一數23歲到而家，跑勻祖國30個省、直轄市同自治區；留學期間，喺英國住咗3年，至今去過57個國家。佢話退下特首崗位之後，冇任何退休金，但佢唔做非執行董事同投資，只係全心全力做公務，40%時間留喺內地，40%時間喺國外，好少喺香港，久違咗唔少朋友。過去8日，佢陪屋企人去青海、甘肅同寧夏度假，住民宿亦都住星級酒店；當然亦時不時睇手機，跟進國家隊同香港隊喺巴黎奧運會嘅驕人成績。
梁振英話個人進步、國家就會進步
梁振英話過去40幾年喺國內外嘅經歷，疊加過去8日西北3省之旅，有啲時空交錯嘅感覺。佢為國家進步覺得驕傲，為民族堅強不屈覺得自豪，對未來充滿希望，亦記掛國外戰亂同貧窮地區嘅人民。佢話為人父母好唔容易，生日嘅意義在於唔好忘記母親當日嘅痛、在於感激父母嘅生養之恩；生命嘅意義在於進步，梁振英話個人進步、國家就會進步。
