沈運龍(左)指杜拜王子(右)無騙過香港一毫 與對方「唱K」懂得用普通話唱《茉莉花》
阿聯酋杜拜王子阿里(Sheikh Ali Al Maktoum)喺香港設立家族辦公室延期事件引起社會討論。曾經同阿里接觸嘅香港中東經貿協會創會會長沈運龍話，對方非常誠懇嚟香港，冇呃過香港一毫子。
沈運龍接受電台訪問，話舊年12月喺香港認識阿里，佢介紹協會會員之一、中唐空鐵國際業務部總裁麥懿睿畀阿里認識。協會之後喺今年2月回訪杜拜，知道麥懿睿接受邀請，幫阿里喺香港建立家族辦公室。沈運龍話阿里曾經去中國多個城市了解，有心設立家族辦公室喺香港同內地投資。佢又話阿里好快落戶香港，絕對係協會嘅功勞，強調之前聲明話阿里嚟香港唔係出自佢嘅邀請，講法唔係「割蓆」。
早知阿里「唱得」
有報道引述消息話，阿里曾經喺菲律賓以歌手身分出道，藝名叫Alira。沈運龍話早喺同阿里見面之前，已經喺網上知道佢「唱得」，所以喺見面當晚嘅小型派對同阿里唱卡拉OK交流，更加話對方識得用普通話唱《茉莉花》。
另外，沈運龍話有網上評論連沙特阿拉伯同阿聯酋都未分得清楚，而政府委派出席家族辦公室開幕禮嘅官員又不斷降級。沈運龍話香港既然想吸引中東資金，包括政府官員在內應該多啲了解當地文化，唔係嘅話缺乏當地文化知識會搞出好多笑話。
amJetso送太興鮮臘腸 👇立即按此參加
