2024-07-19 16:52:57

Ray Online｜「班長」廖長江大會出席率最低　解釋早前身體抱恙

立法會大會放暑假，傳媒統計議員大會出席率，發現「班長」廖長江同選委界議員陳曼琪出席率91%，同樣位列最低。

廖長江回覆傳媒查詢話，立法會會議有時同喺北京舉行嘅全國政協常委會撞期，加上前排身體唔舒服，已經向立法會上報缺席原因。佢又話「一國兩制」下係「一國」先行，會先履行全國政協常委職責，再履行立法會職責。至於陳曼琪亦係因為身體唔舒服而缺席，話而家已經好返啦。

廖長江上年向議員發千字文定下表現指標

話說上年傳媒報道立法會通過多項政府法案嗰陣，在席議員唔過一半，「班長」廖長江之後就向一班議員同事發千字文定下表現指標，包括要求喺立法會大會、內務委員會同埋財務委員會上，非記名表決至少要有一半議員在席。另一個新規定係立法會大會期間，如果議員有事需要離開立法會1個鐘以上，需要透過WhatsApp群組申報。不過點知今年計算大會出席率，就係「班長」本人嘅出席率最低啦。