監警會今日(20日)舉行會議,一班委員坐定定聽有關香港輔助警察隊嘅簡報,負責匯報嘅高級警司介紹完輔警招募情況,仲趁機幽委員一默,向委員推銷輔警工作,話工作好有意義,仲試圖拉委員「入伍」,「如果你哋童年寫過我的志願係警察,又或者你哋睇過警匪片,有一刻諗過自己想做警察呢,不妨考慮一下,加入輔警嘅行列。」
王沛詩笑指監警會委員不能任警務人員
不過,監警會主席王沛詩就保持頭腦清醒,笑住澄清「我哋好有興趣,但監警會嘅委員係冇資格做警察嘅,做警務人員就唔可以做監警會,今次我哋就只能婉拒嘞」,引起現場其他委員哄笑。警員欠缺人手就係人都知,但呢位阿sir公開想向監警會「搶人才」,又誇張咗啲喎。