2023-09-01 11:38:47

Ray Online｜鄧炳強：身在星洲心繫香港　一直與香港團隊緊密聯絡

鄧炳強指心急趕返香港協調工作

香港正受颱風吹襲，行政長官李家超委派保安局局長鄧炳強負責相關協調工作，之不過鄧炳強至噚日仍然身處新加坡訪問，以至噚日晏晝政府跨部門記者會要由副局長卓孝業代為上陣。鄧噚晚就發文話「身在星洲，心繫香港」，雖然身在新加坡，知道香港打風，更有可能係近年少見嘅超級颱風，所以一直同香港團隊緊密聯絡，協調各單位確保市民安全。佢話一方面心急趕返香港，另一方面都要呼籲市民唔好忽視颱風，需要做好預防工作，並盡量留喺家中以確保人身安全。

由佢發布嘅相片可見，鄧炳強一邊傾電話，一邊用紙筆記錄內容，腳上仲放有一部平板電腦，望落好忙碌啊。仲見到佢眉頭緊皺，嚴陣以待。而去到今日，見佢已經返到香港啦，皆因佢同政務司司長陳國基一齊現身緊急事故監察及支援中心視察。