鄧炳強讚民建聯小花莊雅婷(左二)「棄暗投明」，放棄英國大學到北大就讀
青年民建聯喺將軍澳海濱公園舉辦「一啡沖天」大灣區咖啡青年節，保安局局長鄧炳強出席活動嗰陣，大讚主辦活動嘅民建聯西貢區議員莊雅婷「棄暗投明」，當年放棄英國名牌大學嘅取錄，而升讀北京大學。
出席活動嘅鄧炳強提到今日將軍澳海濱公園充滿陣陣咖啡香，令人特別醒神。鄧炳強特別期待活動中有皮蛋、茅台等具中國特色嘅咖啡，又親身品嚐社企「無障咖啡」，大讚冇得頂。佢致辭嗰陣大讚莊雅婷同團隊年輕有活力，又提到莊雅婷喺2018年放棄入讀英國名牌大學嘅機會，而選擇喺北大讀書，親身了解國家發展，而家更加投身社區工作，服務市民。鄧炳強寄語青年好似烘焙咖啡咁，奮鬥嗰陣搵到節奏同溫度，積極裝備自己，喺大灣區同國家發展舞台上大顯身手。
今次嘅大灣區咖啡青年節有嚟自全國省市大約60個品牌參與，莊雅婷解釋係希望通過咖啡呢個「共同語言」，推動大灣區城市之間嘅交流，令大家更了解大灣區發展機遇。另外，透過用年輕人鍾意嘅咖啡文化做切入點，亦係希望同區內青年有更多交流機會。莊雅婷多謝團隊幫手，提到平均年齡只係得20幾歲，又後生，又充滿活力。
活動詳情
「一啡沖天」大灣區咖啡青年節
開放日期：3月15至16日
時間﹕早上11時至晚上8時
地點：將軍澳海濱公園
▼民建聯小花莊雅婷▼
立即更新/下載AM730手機APP 體驗升級功能
