陳紹雄擔心環境局有心無力，唔能夠將氫能提升至產業發展嘅層面。(資料圖片／李睿哲攝)
新一份《施政報告》提出，港府出年將會制訂《香港氫能發展策略》，展開修訂與製造、儲運同使用氫能相關法例嘅準備工作，2025年向立法會提交草案。本身係中電高級顧問嘅選委界立法會議員陳紹雄，好開心政府即將展開呢啲工作，但擔心負責嘅環境及生態局局長謝展寰有心無力喎！
既樂見又擔心環境局負責氫能項目
事關謝展寰今日(30號)出席立法會一個委員會，陳紹雄發言開頭先提到好開心，亦都樂見項目由環境及生態局負責，因為謝展寰係一個有心同有魄力嘅局長，過去即使未有一套完整法律框架，都已經審批咗十幾項試驗項目。
點不知，陳紹雄話鋒一轉就話好擔心謝展寰有心無力。原來佢話礙於環境及生態局嘅職權同政策思維，導致當局只能企喺能源使用嘅角度出發，唔能夠將政策提升到氫能產業發展嘅高度，關注政府係咪唔認為香港要捉緊機會發展氫能產業鏈。謝展寰就話，其實推廣綠色產業都係今屆政府嘅施政重點，只係牽涉嘅範疇實在太多，所以今份《施政報告》都冇着墨太多，好多嘢仲喺度構思同討論。
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
