岑浩璋希望青年科學家取得科研成就嘅同時，都能夠培養社會責任感。(羅庸軒攝)
港府近年致力推動創科發展，吸引愈來愈多年輕人投身相關範疇。香港青年科學院院長岑浩璋話，希望青年科學家喺科研上取得成就嘅同時，都期望佢哋能夠培養社會責任感，又話呢幾年香港發展機會增加，青年持續貢獻創科嘅話，若干年後或者可以為社會帶嚟改變。
將實驗室埋首工作同大眾分享都有樂趣
青年科學院今個月13號舉行第二屆青年科學家峰會，唔同地區嘅青年科學家、學者同專業人士會進行演講同研討。岑浩璋提到，青年科學家能夠喺峰會聚首和交流，仲可以提升大家嘅眼界同水平。佢話，喺實驗室做科研固之然有樂趣，但將每日埋首嘅工作同大眾分享都可以好有意義同樂趣，又提到提升科研生態雖然好難兩、三年內見到可量化嘅顯著成果，但只要公眾增加關注，被關注嘅題目愈來愈多就係可以感受到嘅成果。
岑浩璋強調，唔係一定要同公眾做科普先叫社會責任，做好科學家本分嘅科研已經得，但如果再踏出一步令科研成果更加「落地」，就可能為社會帶嚟更大嘅影響力。唔少香港鄰近城市或國家發展創科都有一定成績，佢就讚香港有5間大學躋身全球百大都唔易，又話香港嘅好處正正係唔使同其他地方比較，與其思考香港比起其他地方有咩弱點，不如諗下創科成果點樣令大眾喺經濟、就業同日常生活應用上感受到。
立即更新/下載AM730手機APP 體驗升級功能
