公務員事務局組成一隊30人的政府應急隊，到鰂魚涌街清理路面，常秘梁卓文(右一)亦有親自揸起鐵鏟清垃圾。(公務員事務局FB)
被政府形容為「500年一遇」嘅世紀暴雨襲港後，全港多區路面都布滿泥濘沙石，嚴重阻塞道路。公務員事務局今日(10日)組成一隊30人嘅應急隊伍，去到鰂魚涌街同筲箕灣嘅耀興道、筲箕灣道幫手清理路面，其中見到公務員事務局常任秘書長梁卓文都一齊揸起鐵鏟，同其他應急隊隊員一齊清理路面沙石。
公務員事務局：目標係社會交通回復正常
公務員事務局喺社交網站出帖，感謝部門員工積極參與，又話一齊清理路面垃圾同樹枝落葉，目標都係等市民生活同社會交通盡快回復正常。喺嗰篇帖文下面，就見到民建聯立法會議員梁熙留言，多謝政府部門發揮「民有所呼，我有所應」精神，動員政府應急隊去鰂魚涌街清理。
梁熙曾反映鰂魚涌街情況
點解梁熙會咁講？原來佢前一日喺社交網站提到，太成樓至太隆樓嘅一段鰂魚涌街因為屬於私家街，所以只依靠業主自行負責清潔，而事後就未見業權人處理問題。睇返公務員事務局嘅相，就見到清理嘅範圍正正係梁熙噚日所指嘅地方，莫非真係「我的帖文起了作用」？
amJetso送太興鮮臘腸 👇立即按此參加
