2018-10-11 15:57:00

天文台「晚輩圖」溫馨提示天氣轉涼網民like爆

香港天氣轉涼，天文台昨日就喺facebook上載一幅名為「我們這一家」嘅WhatsApp群組對話截圖，圖中兒子用長輩圖提醒「老媽子」、「老竇竇」及「低b妹」，入秋天氣稍涼，要保重身體，獲媽媽感動回覆「兒子真生性媽媽很安慰很感動都哭了......」

天文台又形容「長輩圖」都可以變「晚輩圖」，歡迎市民「逆襲」：「教識長輩用smartphone後，不時會收到一啲精美圖片，可能你會覺得好老套、好煩又嘥data，但諗真啲，其實係愛嚟㗎，哈利！趁冷鋒到，今晚同未來一兩日天氣會稍涼，亦會有幾陣雨，嚟個晚輩圖嘅逆襲，用番佢哋熟悉嘅關心方式，等佢哋心頭一暖啦！」

帖文喺1日內吸2000個Like，好多網民大讚溫馨又貼地，紛紛轉發分享，又指WhatsApp群組中嘅「老媽子」發訊息時無用標點符號，感覺真係好似日常生活中嘅媽媽，但就笑「長輩用語音辨別係會出錯別字㗎。」

天文台小編嘅創意亦得到大讚：「天文台能夠請到一位具創意又貼地的Designer真係難得。」「呢位admin幾時有得加人工呀」。而天文台亦喺帖文留言中，上載呢張長輩圖原圖，仲加TAG「此圖適合長輩晚輩前輩後輩平輩等任何人分享」