徐英偉傳有意出選立法會 他否認並指公職及朋友之間一定選擇後者｜Ray Online
最近有局長落台，而喺上屆政府落台嘅前民政事務局局長徐英偉有傳重返政界，話佢有意出選旅遊界立法會議員。不過，徐英偉斬釘截鐵咁澄清，話唔會參選立法會選舉。
今日有報章專欄話酒店業主聯會執行總幹事徐英偉，有意參選出年嘅立法會選舉，角逐旅遊界議員席位。佢之後喺電視台節目澄清，話對佢嚟講朋友好重要，同現任旅遊界議員姚柏良合作得好好，私底下甚至公開講，姚柏良都係佢唯一支持嘅立法會議員。
徐英偉指退黨有其他原因
徐英偉澄清唔會參選立法會選舉，希望唔好有謠言影響佢同朋友之間嘅合作。佢揚言如果要佢喺公職同朋友之間選擇，一定會揀朋友，係基本原則。專欄又提到徐英偉退出民建聯，係因為民建聯對支持佢出選猶豫不決。徐英偉話退黨有其他原因，「真心講，對我嚟講曾經做錯事，勇於承認係應該。其他人有冇做，做咗乜嘢，由佢哋處理，我唔做『金手指』」，相信佢係講緊當初疫情期間出席港區人大前代表洪為民生日宴嘅事。睇嚟徐英偉對今次謠言好嬲，仲意有所指，佢話「造謠抺黑，影響到家人係侵犯底線，士可殺不可辱。」
