待判甚或面臨入獄厄運的心理狀態，是恐懼還是從容？李永達選擇了後者，大抵人如其名──永遠豁達，他在案件宣判前讓腦子放空，專注書寫回憶錄，為自己半生投身社運作結；在政圈經歷無數高低起伏，一簑煙雨任平生，回首近30年從政生涯，他以一句說話概括，「路遙知馬力」，雖然爭取民主未竟全功，但他無怨無悔。
記者；鄭秀韻 攝影：鍾式明
佔中九子案將於今日宣判，法官的判決，無人能料。身為九子之一的李永達，等待宣判的心情如何？他形容「真係好大鑊」，大鑊的不是擔心坐牢，而是朋友飯約如雪片飛來，當中有近三十年無見的大學同窗，大家都認定他要入獄，因此趕與他吃「最後」一餐；除此以外，當事人心裡反倒十分平靜，誠如他在書中形容，他對入獄並沒有甚麼恐懼，儘管他個人估計刑期至少1年。
這些年大家都看到抗爭需付出失去自由的代價，但相比內地異見人士被囚動輒5年甚至10年以上、菲律賓獨裁管治時期神職人員為爭取公義突然人間蒸發，他形容在香港抗爭付出的代價相對「蚊滋」，但眼見多少年輕人被送入獄，他不無感慨，「相對啲後生仔，佢地咁後生都坐過(監獄），我呢啲老嘢，六十幾歲，搞咗幾十年民主運動，連捉都未俾人捉過，唔係好講得過去……」
卡斯特羅五十年代接受軍法審訊自辯時吐出名言：「歷史將宣判我無罪！」李永達心態亦然，「法庭判我有罪，我唔會反對，但我做抗爭、公義運動，我唔係著重法庭對我點睇，係歷史對我點睇。」問他有否後悔參與佔領行動，答案當然是無悔，「已有心理準備！」
2017年收到警方預約拘捕的通知，促使李永達要出書，終趕在案件宣判前出版回憶錄《判刑前的沉思》。全書共20章，前半部寫個人經歷，從他孩堤時代開始，到入讀港大、參加學生及社會運動和參選從政的點滴；後半部寫共產黨在民主派的滲透、及民主運動何去何從等，其中一章更獨立寫對他影響最大的已故民主黨元老司徒華。
冀藉新書策勵同路人
他寫這書不單是對自己多年來參與社運的小結，更重要是希望策勵同路人，「依家(局面)好困難，大家要頂住壓力，希望個訊息俾大家有鼓勵性。」書名原是《入獄前的沉思》，但編輯謹慎起見，卒以「判刑前」取代；至於取名「沉思」，「我寫好多嘢要沉澱，書中寫嘅問題，關於雨傘、民主派嘅嘢，有啲觀點好想講」，例如他認為民主派現時工作太事務性，「人哋(政府)出政策，即去咪兜講三十秒，再係咁俾政府帶住走好快死，呢個係沉思過程要講，議員太追求短時間嘅曝光……」但他直言，「本書寫得唔夠多」。
在鴨脷洲出生並度過青春成長期的李永達，沒有鴨脷洲口音，有的是一口懶音，有趣的是，他投身社會的工作都是靠把口搵食。高中年代受兄長影響，李永達開始涉獵時事刊物；1976年入讀港大，他積極參與學生運動，畢業後在中學任教，數年後參加區議會選擇，從此踏上從政路。
理想與現實，從來有很大差距，在政圈浸淫多年的李永達，對此感覺尤甚，「所以亦令我覺得比較沉實，同埋喺大風浪裡衝擊冇咁大。」曾有年輕人跟他說，重返金鐘感到傷痛，因為這裡曾發生雨傘運動，「我冇乜呢個感覺，因為我痛咗好多次。」他數算自己從「靚仔」時代做基本法諮委、爭取八八直選及民主基本法、97年未能過渡立法會要「落車」、中共2010年應承10年後檢討政制給予香港民主但食言等經歷，「我有好多唔同階段努力過，但亦失敗過好多次，冇成功過，我會變得個人沉實同堅毅，失敗咗嘅反應好平靜，唔係我indifferent，我都唔開心，但我同後生仔講，我哋爭取民主嘅(對象)係共產黨，共產黨依家差不多係世界最專制、最強大嘅國家，佢唔俾民主你，你可能要比其他人多好多好多倍嘅力、好多世代先攞到……」
遺憾仍未有全面普選
爭取民主從來沒有捷徑，「華叔(司徒華)成日講，爭取民主係一個漫長、曲折、崎嶇嘅道路，華叔過身，民主都未到，講得俗啲，孫中山1911年搞完革命後至今一百年，都未有民主中國……」他認為失敗是一種磨練，「我從來唔信冇磨練嘅成果，我亦唔信冇抗爭嘅民主，等於台灣民主真係鬥番嚟，死好多人，二二八事件、黨外抗爭運動、中壢事件……」回首從政得失，「遺憾實有，自己同好多同輩人爭取全面普選，到依家都唔成功，呢個可能係最大遺憾。」
雨傘運動無功而還，很多人像是患了集體憂鬱症，久久未能走出陰霾，「呢個時間係民主派低潮係真嘅，市民有無力感係真嘅，如果唔真，冇理由遊行示威咁少人……」但他認為絕不可屈服於現實，「市民有權有時唔開心，但領導層唔可以咁做，政黨阿頭、搞民主運動嘅人，呢個時候係考驗我哋嘅堅毅……」
他又重提民主派花太多時間在議會等的事務性工作，更毫不客氣直斥民主派飯盒會「係廢嘅」，「市民係想你廿三個大帝(民主派立法會議員)、阿哥阿姐話俾我哋聽，呢3年、5年、10年想點行，而可以有少少勝利返嚟，你答唔到呢個問題，猛call人集會，人哋係唔會嚟。」他承認民主派缺乏魅力型領袖是其中一個原因，但並非唯一原因，「依家市民最困局係你俾唔俾到我哋方向，中期5年、10年，你叫我點走？」他以劏房戶為例，要告知上樓時間表，「如果捱3年，我咪捱囉，但我未聽過佢哋講，如果佢哋覺得呢啲嘢唔係嘢，咁我哋咪收工囉。」
63歲的李永達，依然有火。
【限時激減】800 amFUN 2盒！1200 amFUN 4盒！
