楊潤雄元旦日喺社交網站祝大家新年快樂，羅淑佩都有留言同讚好。(楊潤雄FB截圖)
踏入2025年好多人都希望有個新開始，文化體育及旅遊局前局長楊潤雄都唔例外。佢喺元旦日朝早7點幾再次更新社交網站，再次上載一張維港兩岸景色嘅相，寫住「新一年，新開始。Happy New Year!」
唔少人繼續稱呼楊做局長
楊潤雄上個月同林世雄一齊被免職，佢當日就喺社交網站上載一張維港相，寫上「謝謝大家關心！天空海闊，踏上人生另一階段。」今次係佢自離任當日之後嘅第一個帖文，相片內容亦同上次一樣係維港景色，不過佢就冇交代佢嘅新開始同日後去向係咩。佢下一任、現任文化體育及旅遊局局長羅淑佩都有讚好同留言「Happy New Year! 」祝福新年快樂，亦有其他局長同立法會議員留言祝福，包括民政及青年事務局局長麥美娟、議員葛珮帆、江玉歡等。
留言欄同時見到香港餐飲聯業協會會會長黃家和同旅遊促進會總幹事崔定邦嘅祝福，以及一眾網民留言，有人就希望楊潤雄東山再起，「永遠支持你為社會做既(嘅)服務」，亦有唔少人繼續用局長稱呼佢，「估唔到楊局長的攝影技術又幾好」、「楊局長新年快樂，祝你退休快樂。」
立即更新/下載AM730手機APP 體驗升級功能
