![何永賢周一視察啟德簡約公屋地盤期間,她所穿的安全鞋突然「半甩底」。(何永賢fb圖)](https://cdn.am730.com.hk/s3fs-public/styles/article_image/public/2024-07/450177196_450450514424653_3916759589682416171_n.jpg?itok=ecMOoVF1)
何永賢周一視察啟德簡約公屋地盤期間,她所穿的安全鞋突然「半甩底」。(何永賢fb圖)
房屋局局長何永賢禮拜一(8日)去啟德簡約公屋地盤視察,話工程進度良好,但離開嗰陣發生咗小插曲,就係陪佢行地盤嘅安全鞋竟突然「半甩底」。佢話對鞋係「功成身退」,仲叫同事幫呢雙安全鞋拍張「退休照」留念,然後放上社交平台與網民分享。
何:終於「功成身退」
何局長話,啟德工程進度良好,仲話單單睇下打樁機同天秤嘅數目,就知道啟德個項目工程已經全面開始。但她話要喺兩年內建好過萬個單位,絕對唔容易,面對嘅挑戰包括地底情況「不似預期」,有啲樁柱要打到90米深,不過佢嘅團隊都即時調整策略應對,冇阻礙工程進度。
不過呢,何局長離開嗰陣發現佢嘅安全鞋突然半個底甩咗。佢話呢雙安全鞋陪佢走過咗好多大小工程,渡過唔同挑戰,每次出動都係為市民服務,依家呢雙鞋終於「功成身退」。佢特登叫同事幫佢對鞋影低「退休照」留念,仲話係時候再換雙新鞋,繼續保護佢行喺凹凸不平嘅路上,無論多困難嘅任務都會同團隊一齊成功完成喎。阿Ray衷心希望何局長喺為人民服務嘅同時,亦要小心工地安全。