鄧炳強透露最想一位港隊運動員奪金 因對方支持保安局青年工作｜Ray Online
巴黎奧運即將揭幕，特區政府官員都出動為國家隊同港隊運動員打氣。保安局局長鄧炳強、副局長卓孝業同埋常秘李百全拍片，透露各自嘅心水運動員。
鄧炳強話最想劍擊「世一」江旻憓奪金，因為對方好支持保安局青年工作。翻查資料，作為香港十大傑出青年嘅江旻憓，曾經喺前年出席保安局青少年制服團隊領袖論壇，分享自己迎難而上嘅經驗。至於國家隊，鄧炳強話最支持「女長城」中國女排，因為國家隊早排嚟香港比賽，佢有機會為佢哋打氣，仲同隊長袁心玥合照。
卓孝業最期待新項目霹靂舞
講到副局長卓孝業嘅心水項目，佢最想睇今屆新項目霹靂舞，加上國家隊都入圍項目，聽講仲可以衝擊獎牌！港隊方面，卓孝業最想睇羽毛球雙打代表謝影雪同鄧俊文，今屆係佢哋最後一次參加奧運，希望佢地可以打出自己最滿意嘅成績。
常秘李百全就最想睇港隊游泳運動員何詩蓓出賽，留意到對方喺過去一段時間，參加好多國際賽事，不停磨練、提升能力，希望今年再創佳績。國家隊就最關注跳水運動員全紅嬋，欣賞對方比賽嗰陣好冷靜，入水一刻仲完全冇水花！
