深水埗區關愛隊富昌小隊同黃昕然(藍雨褸者)，日前清理堵塞渠口同街上枯枝樹葉。(梁文廣FB)
強颱風小犬襲港之後，各區路面都有大量樹枝、樹葉和垃圾待清理。身兼立法會議員嘅深水埗區關愛隊富昌小隊成員梁文廣，噚日(9日)就喺社交網站貼咗幾幅相，提到富昌小隊義工一落八號波同取消黑色暴雨警告，就即刻巡視社區，仲同深水埗民政事務專員黃昕然一齊清理樹葉，疏導淤塞渠口。
不過，隊員同黃昕然着住唔同顏色嘅雨褸，都不及相中一張粉紅色紙上面嘅字搶眼。喺梁文廣貼出嘅每一幅相，都見有位女士手持一張印有「深水埗區關愛隊富昌小區」嘅紙，連部分雨褸背後都貼有相同字樣。
影相為滿足KPI
大部分網民焦點都落咗喺舉牌嗰度，質疑關愛隊點解要專登搵個人舉牌影相。睇返其他關愛隊嘅颱風善後工作相，都見到類似舉牌式影相紀錄，包括同區嘅元州小區關愛隊。有報道就引述知情人士話，影相係要滿足關愛隊嘅「關鍵績效指標」(KPI)，至於舉牌就係因為關愛隊成立冇耐，印有小隊名嘅制服仲未起到貨，所以先要咁樣影相以茲識別。
