依家唔少餐廳都改咗用QR Code(二維碼)落單，過往不時都有網民唔小心將個Code貼咗上社交媒體，無辜辜「被點餐」。經營叙福樓飲食集團嘅優質旅遊服務協會主席黃傑龍日前都犯咗同樣錯誤，佢事後呼籲大家千祈唔好好似佢咁愚蠢犯呢啲錯誤。
1分鐘已被柯打1434元套餐
話說黃傑龍受邀參與噚晚啟德體育園開幕典禮，佢喺當日下晝就話都係趁開幕禮前食飯穩陣啲，就去咗啟德零售館一間佢集團旗下嘅燒肉店食飯。食飯就當然不忘打卡，不過佢同時亦都忘記咗枱面有個落單QR Code。事後佢話出咗張相只係1分鐘，就已經有人幫佢柯打咗二千幾蚊食物，包括一個價值1,434元嘅6人套餐。
黃傑龍最後就話，好彩間舖頭係佢嘅，隨即行入去廚房叫佢唔好做就得，又話有啲人心地好差，提醒大家千祈唔好好似佢咁愚蠢犯呢啲錯誤喎！帖文吸引唔少網民留言回應，有人就獻計話廚房如果真係做起咗，就可以送畀在場一位幸運食客，黃傑龍都不禁話「我應該請你做marketing顧問」。
▼啟德體育園3月1日舉行開幕典禮▼
入App免費換走健康產品
