30歲不只是女性的關口，也是職場一道關卡。二十出頭的年輕人，職場打滾數年後，能登上行業高峰的畢竟少之又少，更多是熱情熄了一半、又「半新不舊」的夾心人。躊躇在轉換跑道的關卡，有人選擇到國外工作假期(Working Holiday)，這個29+1前的抉擇，應該如何取捨？
Working和Holiday不知何時開始可以變成朋友，與香港簽訂工作假期計劃的地區和名額愈來愈多，為18至30歲的年輕人提供工作假期簽證。不少嚮往到外國生活，又或職場不盡如意的年輕人躍躍欲試，有人在網上求教：「小妹26歲，畢業後做咗4年嘢，月入萬幾，工作無乜前景，身邊好多人去工作假期，又迷茫又迷失嘅我好無去工作假期？」有曾到澳洲工作假期的網民回應：「睇你目標係乜，行開吓無壞，原本想練下英文，結果講國語仲多。返嚟之後要重新搵工。」亦有人認為：「眼界闊咗，一定係好事，我過咗年紀無機會，如果後生一定去。」
學友社學生輔導中心總幹事吳寶城表示，隨著計劃覆蓋國家和名額愈來愈多，加上在外工作和生活的資料豐富，工作假期已變成潮流氣氛。他建議年輕人決定參與計劃前，要考慮機會成本，「做緊嘢嘅年輕人，要諗會唔會浪費咗現有嘅工作經驗；亦要思考返嚟之後，重新工作取得嘅待遇。決定出發時，應思考自己嘅目標，例如想獲得乜嘢工作經驗、外語能力，同世界觀等。相對剛畢業嘅新鮮人，機會成本就無咁大。」至於工作假期能否有助日後找工作，他認為「如果份工要求有創意、有國際視野嘅，可能有幫助；不過都要年輕人綜合、反思有關嘅體驗，唔係淨係玩樂。」
周綺萍：不等於工作經驗
安俊人力資源顧問董事總經理周綺萍則認為，年輕人要先考慮其行業狀況，「譬如做會計，年資經驗好緊要，去到嗰個moment無端端斷咗；又或者入行三、四年嘅年輕人，有潛質升職嘅，去咗外國咁一定影響發展。從事旅遊、酒店業可能會『加分』，但Working Holiday經驗唔等於工作經驗，技術要求並唔一樣，譬如去果園工作，唔同實際辦公室嘅工作。更多時候，老闆睇重持續工作經驗，出面無人知你係Working定Holiday，可能只係Holiday呢。而且出去一兩年，老闆會擔心同行業脫節。」
外遊搵工
做好計劃
吳寶城補充，儘管接觸的大部分年輕人，對工作假期經驗評價正面，但仍有不少人與預計有落差，「有人諗住出去做嘢，會有好高待遇，但結果發現，要搵適合嘅工好難，甚至要做黑工，更有個案被剋扣人工。同時因為其他國家或地區都有配額，出去要面對例如台灣人、韓國人嘅競爭。年輕人出發之前都要做好計劃。」
立即更新/下載AM730手機APP 體驗升級功能
