年尾又到，打工仔都期待收到老闆的加薪信，有得加固然高興，但開心之餘難免好奇加幅是否「跑贏同事」。這個辦公室的秘密，應否與同事分享？若有同事問到，又應如何回應？有人事顧問提醒，「即使心裡很想問，很想講，都千祈唔好開口！」
不少公司都會在年底派發加薪信，儘管多數人都會認同人工和加薪幅度是私隱，但仍有人「不恥下問」，開口向同事探口風。有網民在討論區分享，指有新同事上班首天，就問同事人工是多少；也有網民分享，指每次公司加薪後，均有同事詢問加幅，向網民請教應否如實相告。多數網民認為不應透露：「叫佢問老闆。」但亦有人認為，「幾多人工其實怕乜俾人知。」
問人工反映質素
一句簡單的人工提問，原來涉及的內容並不簡單，嶺南大學人力資源管理及企業行為碩士課程主任林敬新表示，「首先，人工同人工加幅，好多時係一間公司嘅機密。如果一個員工問人呢樣嘢，老闆一定會覺得你唔專業同唔成熟；甚至會懷疑誠信，覺得問得呢樣嘢，會唔會問埋其他？再者，知道同事加幅有咩用呢？薪金加幅涉及好多因素，年資、起薪、能力、工作表現等等，同職唔一定同酬，自己做好自己工作就夠。」
安俊人力資源顧問董事總經理周綺萍亦認為，「即使同事肯講，但加幅高過或低過自己，都唔會舒服。」她指管理層不會贊成員工透露或打聽人工資料，認為會影響公司營運；站在同事角度，「除非已經係交心朋友，否則同事其實係競爭對手，就算人哋答你，都可能係假啦。一般公司都會講平均加幅，高過平均當然高興；低過就應該警惕同檢討自己嘅工作表現，反而呢樣先最緊要。」
入房討價還價？
至於加幅不如預期，應否敲門入房向老闆討價還價呢？周綺萍表示，「通常講得嘅都係final(定案)，如果加幅低過平均數，了解背後原因反而更加重要。唔係錢嘅問題，都要明白點解表現會不符合公司期望。要知道自己處在公司咩位置，今次低於平均加幅，難保下次唔係裁員。員工應該同自己主管了解邊個環節出問題。」林敬新則認為，「先要了解公司制度，睇下人工點計算先。再評估自己的議價能力和行業發展，若從事的行業本身叫價能力高，咁可以試下有無得傾；如果行業發展比較侷限嘅，咁做生不如做熟啦。」
同事問到點答好？
若真的有同事「不恥下問」，周綺萍教路，「可以婉轉啲答佢，譬如話『同大圍差唔多』，或者『都滿意啦』。如果對方都無知難而退，仍然要查根究柢，問實際數字的話。唯有直接同對方講：『我唔方便講。』而且要有清晰態度，等對方唔好再追問。」
立即更新/下載AM730手機APP 體驗升級功能
