樣樣嘢都po上社交網站，唔通樣樣嘢都可以po上網？潮流興「打卡」，去旅行、食好嘢、做運動都要po上社交網站，與好友分享。若職場遇上不愉快事情，又應否在社交網站留言抒發一番？有輔導專家勸告，在社交平台訴苦，隨時引起更大餘波，「倒不如同朋友當面傾訴」。
打工仔返工受氣在所難免，無論與顧客、同事，抑或上司有意見分歧，盛怒之下，可能會選擇在社交網站發文吐苦。有網民分享稱，「之前同同事鬧交，忍唔住喺facebook度吐苦水，話個同事幾句。最近發現有同事cap圖(截圖)，再喺WhatsApp群組度唱我，我而家唔知點算。」網民反應兩極，有人認為公司事不宜在網上討論，「版主自己攞嚟。」亦有人覺得在個人社交網站分享並無不妥。有人認為與行業有關，「如果工種簡單，好似做普通零售嘅，都無乜問題；如果坐office，有辦公室政治，日日刀光劍影，咁就唔好啦。」有網民更提出要從源頭入手，「所以千祈唔好add同事做好友。」
循道衛理輔導中心輔導主任方健貞認為，「職場嘅不愉快，想喺網上分享無可厚非，但一定要諗清楚個後果。」她舉例，「若抱怨對象係客人，如果描述得太明顯，可能會令公司尷尬；如果抱怨同事或上司，投訴人嘅好友同被投訴者彼此更加可能相識，後果可能係軒然大波。」她補充，個人情感難免主觀和偏頗，「好多時都覺得自己啱，繼而影響判斷。所以社交網站未必係適當抒發渠道，倒不如搵朋友當面傾訴。」
合眾人事顧問公司總經理蘇偉忠亦認為，「網上講公司嘢可免則免啦。互聯網世界無秘密，公事唔應該上網公開討論。有啲公司請人甚至會上社交網站查閱應徵者過去留言，無謂影響自己前途。」
加上司做好友要三思
至於應否加上司為「好友」，方健貞認為「要視乎彼此交情外，還要衡量雙方關係會否變得更複雜。人際關係需要保持適當距離，如果係上司下屬關係，下屬會唔會以為做『好友』，上司就會對佢偏心？又會唔會衍生吹捧、刷鞋風氣？雙方期望會唔會有落差？以後講嘢會唔會有顧忌？所以要諗清楚個後果。」若遇上被上司要求加為「好友」又應如何應對，她承認「處境的確為難，要衡量代價同後果：順應上司保持友好關係；抑或敢於拒絕，而換取在社交網站留言毋須避忌。」
立即更新/下載AM730手機APP 體驗升級功能
