在辦公室拼搏一天，收工與三五同事晚飯輕鬆一下，是不少打工仔的日常生活。飯後埋單，有時難免由一人付款，回辦公室再收錢。倘若遇上「大懵」同事，追數就變成內心掙扎，開口覺得難為情；不開口就無故破財，追與不追，又應如何是好？
不少打工一族都曾經歷追飯錢的心理交戰，本報飲食專欄「糧草先行」作家士兵憶述，以前曾遇上「大懵」同事，「通常食飯由一個俾住先，之後嗰日返公司先計。大部分同事都會『自動波』俾錢，係有一個唔俾。以為唔記得啦，問佢就話『過兩日』，點知過兩日又兩日，唔想為幾百蚊擘面，咁咪下次唔預佢囉。」飯錢最終變成呆壞帳。網上論壇亦有不少個案，有人向網民請教，「同事爭我48蚊飯錢唔還，追又好似好小家，唔追又蝕，點算？」有人建議「當跌咗啦，以後唔好幫佢俾。」亦有人獻計「喺公司眾人面前追，等佢無得唔還。」有分享更稱與職級有關，「嗰個係我老細，每次食飯都唔俾零頭，58蚊就俾50。」
食飯夾錢也是責任感
循道衛理中心前輔導及就業統合服務協調主任楊慧兒認為，「雙方都有責任，俾錢嗰個有責任提醒未俾嘅同事；未俾錢嘅更加有責任俾番錢人。」她強調，「大前提係千祈唔好覺得唔好意思開口，有一次就有第二次，咁請得幾多次？未俾錢嘅通常係兩種，一係唔記得；一係唔想俾。前者係要提醒；後者就唔應該縱容。」她稱辦公室應養成良好文化，「對待同事、上司或下屬，都應該有責任感，如果俾飯錢呢啲小事都做唔好，到處理工作大事點算？」她續指，「最理想做法係飯後即場夾錢，咁就唔使俾來俾去，省卻『賴貓』情況。」
合眾人事顧問公司總經理蘇偉忠亦認為，「最好方法都係直接同佢講，今日無帶，唔會聽日又無帶啩？下屬唔應該奉旨要上司請，同事之間就更加唔應該。有時主管係會請客，但員工要睇情況，如果預咗餐飯由大家夾錢嘅，就無理由要主管一個埋單。」
網民點睇：
ita：Ban咗佢，工(公)餘節目全部唔預佢。
janetyan86：當自己跌咗，睇清楚呢個人，以後都唔幫佢俾錢。
rexso1234：我會直接鬧佢，一定要佢俾錢。
patient1：梗係追啦，咩事要請佢食先。
whbryan：直接講，咁厚道做咩？有人搶錢你都唔出聲？
立即更新/下載AM730手機APP 體驗升級功能
