![搵工心得|聽聽自己心底話:接受offer前的七大問題(am730製圖)](https://cdn.am730.com.hk/s3fs-public/styles/article_image/public/2024-07/job_offer_0.jpg?itok=Jw1mORaK)
搵工心得|聽聽自己心底話:接受offer前的七大問題(am730製圖)
當你瞓晒身過五關斬六將,無非都係等一個call:「請問你幾時返得工?」那一刻心情簡直爽爆。立刻say yes?﹗等等,呢個時候你最好冷靜啲,不妨問吓自己以下呢七條問題先決定接唔接受個offer。
文章由SEEK旗下領先的香港網上求職招聘平台Jobsdb提供
1. 我真心想做呢份工嗎?
唔好諗住試吓先,唔啱再搵過,郁啲唔啱就轉工絕對係影響仕途。請詢問HR先俾份合約你睇睇,仔細檢閱要履行嘅職責、未來僱主對你有咩期望,以及評核機制,各方面係咪可以安心接受呢?亦可以問問朋友意見,通常第三者角度、立場會比較中立清晰一點。
2. 經營理念係咪同自己想法一致?
僱主的經營理念係咪你所接納?舉個例,假如你係素食主義者,而你嘅未來僱主卻經營肉類生意;又或者你係非吸煙人士,要你加入煙草公司,對你嚟講衝擊夠大未?當你嘅核心價值同公司離行離罅,長遠勉強落去就好似貌合神離嘅夫妻,唔認同對方的所作所為,最終都係分手收場。
報稅時間、扣稅懶人包 年薪多要交稅?兼職點計?
3. 新職位可唔可以提供事業發展良機?
除咗人工同福利,在職培訓或教育津貼都同樣重要。入職前不妨先問吓HR有關呢方面嘅福利及晉升路徑,以作詳細考慮。
4. 報酬合唔合理?
報酬確係務必關注嘅重要一環。要徹底了解報酬福利嘅細節,包括基本月薪、員工福利、花紅獎金等。仔細考慮呢份報酬足唔足以維持現時嘅生活水平?人工同你嘅資歷係咪掛鈎?
5. 新工有冇彌補舊工嘅不足?
返新工最慘絕人寰嘅情況係—由一個火坑跳到另一個更地獄嘅火坑﹗要避免重蹈覆轍,就要確保份新工係咪足以彌補你舊工嘅不足,無論係工作量、工種、工時、薪酬福利均要仔細衡量。
求職搵工|文科投身AI行業不是夢 精選6大入門職位+4大進修課程
理工大學畢業生薪酬網上流傳? 人工最高首7位均為醫療科
6. 預想一下新同事同你夾唔夾?
趁見工時留意一下坐board嘅人,佢哋當中一定有你嘅未來直屬上司。見工前見工後,乘機觀察吓公司環境,氣氛會唔會令人好緊張?定係好relax?有咗初步印象後,便可預想一下你日後想唔想喺度賣命拼搏。
7. 你嘅直覺話你知啱唔啱?
考慮晒以上六個問題後,你嘅內心自然會得出一個答案,相信你嘅直覺,如果感覺不對,千祈唔好因為有人請就say yes ﹝如果你有條件選擇的話﹞﹗
人生總要面對無數改變命運嘅抉擇,只要冷靜思考,切忌心急衝動,必要時要求HR俾一、兩日時間等你諗清楚。希望大家都搵到心水嘅dream job!