港人熱愛旅遊，不論長中短線，無時無刻都想外遊「叉電」。不過，去旅行的第一關不在買機票或訂酒店，而是在公司搶假期。遇上節日、或「請一放七」的黃金連假，爭假期隨時難過搶特價機票。如爭奪假期對手是上司，只能自動棄權；倘若對手是同事，又應如何定勝負？已成家立室的同事，是否請假爭奪戰的長勝將軍？
農曆新年將至，又到請假外遊高峰期，有從事服務業網民抱怨：「同個同事夾好，聖誕佢放；(農曆)新年我放。點知佢突然話父母新年去旅行，無人照顧細路，我而家讓又唔係，唔讓又唔係。」有人回應：「單身人士爭放假永遠蝕底，有人總係假設單身可以拋棄一切、無牽無掛。」有網民則分享公司以抽籤決定假期，「公司好早就編定更表，如果有同事撞假就抽籤決定，最公平。」
管理層又會如何看待同事放假問題？紡織及製衣界立法會議員鍾國斌認為，「批准員工放假與否，視乎佢手上嘅工作緊唔緊張，有無家室唔係最重要考慮因素，一般亦唔會因為員工有家室而有優待，就算單身都可以陪父母去旅行嘛。」他又稱未遇過員工因放假而爭拗，「最緊要係互相遷就，去旅行一般都係三、五日啫，撞時間咪提早兩日囉。」
有商有量 大家舒服
安俊人力資源顧問董事總經理周綺萍亦認為，同事間「有商有量」是最好方法，「協商解決係最好嘅，今次你放，下次我放。公司應該訂立規矩，搵個大家都舒服嘅方法去處理，唔應該對單身嘅同事唔公平。管理層亦可以考慮，假期開工嘅同事有補水。」不過，高層的確是食物鏈的頂層，「通常都係高層揀先啦，鼓勵同事向上做高層啊嘛。有公司年頭就派假表，高層填先，跟住再到基層。如果大家都係高層，咁就可能先到先得；或者以公平原則，輪流放熱門日子。」
防「奉旨」
要識say no
若遇上永遠要求放假期正日的同事，周綺萍建議，「員工有時要學識拒絕，防止有人『奉旨』。每個人都會有自己原因，就算未有家室，都會有家庭，陪父母、陪男女朋友都係合理原因。單身唔代表無權利，適當拒絕同事，好過因為太過遷就，而令自己好唔開心。」
立即更新/下載AM730手機APP 體驗升級功能
