曼聯仲可以審慎樂觀五大原因？若贏歐霸冠軍成出戰歐聯捷徑。（資料圖片）
雖然曼聯今季聯賽未嚐連勝滋味，去仗不敵諾定咸森林，但紅魔鬼都仲可以審慎樂觀迎接季尾階段。
全力爭取歐霸盃冠軍
曼聯今季英超暫時排第13位，錄得自1973年降班一季以來最差聯賽成績，不過曼聯仲有機會憑著歐霸盃冠軍挽救今個球季。
曼聯經晉級歐霸盃八強，只要過到里昂一關就能夠打入四強，對手將會是畢爾包或格拉斯哥流浪勝方，只差兩關就會躋身歐霸決賽。
如果贏得歐霸盃冠軍，曼聯將連續3季都有錦標落袋，仲能夠取得來季歐聯參賽資格。
歐洲賽戰績彪炳
曼聯今季歐霸盃雖然頭3輪分組賽全部和局收場，但係之後連勝5場，16強更加強勢淘汰皇家蘇斯達。
紅魔鬼是今季歐聯歐霸72支分組賽參賽球隊之中，唯一一支不敗之師。加上幾支歐霸盃大熱冠軍球隊經已出局，所以曼聯絕對有機會封王。
眾傷兵逐漸復操歸隊
勞基梳爾（Luke Shaw）、約羅（Leny Yoro）同哈利馬古尼（Harry Maguire）經已傷癒、復操以及上陣。由於利辛度馬天尼斯（Lisandro Martinez）缺陣，所以馬古尼變得舉足輕重，事關馬古尼一直都係三中堅陣式嘅必然正選。
今季高價收購的約羅自去年12月首次替球隊上陣後，表現亦開始慢慢提升，獲得愈來愈多上陣時間。
飽受傷患困擾的梳爾亦都復操，將可以成為紅魔重要一員，不過領隊艾摩廉（Ruben Amorim）就表示梳爾仲要再提升一下比賽狀態，先可以上陣。
年青小將冒出頭來
雖然曼聯嘅青年軍於青年足總盃四強互射12碼不敵阿士東維拉被淘汰出局，但係紅魔鬼給予一眾青年軍球員較多升上一隊機會。
18歲的希雲（Ayden Heaven）、20歲嘅多古（Patrick Dorgu）、甚至同樣只得20歲的阿歷真度加拿祖（Alejandro Garnacho），都係由青年軍培訓，前途無可限量。
成也般奴 敗也般奴
簡單直說，目前為止般奴費南迪斯（Bruno Fernandes）絕對係曼聯今季表現最出色的球員，如果紅魔鬼想為今個強差人意的球季挽回聲望，般奴將要擔當非常重要嘅角色。
換言之，般奴費南迪斯表現好壞，將會決定曼聯今季命運！
原文刊登於 Yahoo 體育
立即更新/下載AM730手機APP 體驗升級功能
