![](https://cdn.am730.com.hk/s3fs-public/styles/article_image/public/news_cover/65b12cd0-be98-11ed-b6be-6b7a5a7d2ab7.png?itok=IFBiHQnX)
早霸王丨梁嘉琪接任Marco主持工作惹負評 森美護花:係大家掛住Marco
由森美、小儀和孔慶慇(Marco)主持嘅商台電台節目《早霸王》一直受聽眾喜愛,開咪約3年,三人笑料百出並養成默契,不過Marco日前決定辭職,另有新發展。由於上周五(3日)Marco最後一個工作日,森美仲喺日本旅行中,所以森美特意於啱啱過去嘅星期一(6日)邀請Marco回商台一齊做節目,同時宣布由梁嘉琪接任Marco嘅主持工作;但梁嘉琪首集嘅表現惹嚟唔少負評。
聽眾表示梁嘉琪好趕客
梁嘉琪畢業於演藝學院,於無綫主力擔任主持工作,包括節目《學是學非》、《你健康嗎?》等等,至2020年低調離巢主力發展自家品牌,及後又為香港開電視拍攝節目《關於早餐的一些事》,主持經驗相當豐富。不過,《早霸王》聽眾表示梁嘉琪經常大笑好嘈,又對佢唔知咩係魚雷,要森美花時間解釋一大輪稍有微言,表示梁嘉琪好趕客,森美搵錯Marco接班人。而森美於昨日(9日)節目中為梁嘉琪護航,向梁嘉琪表示唔好因為網上留言而唔開心:「唔係你唔好,而係大家都掛住marco啫!」亦指出,大家接受新事物需要時間,覺得新人帶畀節目有新衝擊。森美又提及自己曾於拍攝後問及戴祖儀和另一位富家女「魚雷」一事,二人都表示唔知:「原來個個都唔知,真係怪錯咗梁嘉琪。」