本港大部分學生都會學習最少一種樂器，即使他們有志走音樂路，最後能把音樂當成職業的人卻寥寥可數。旅居歐洲多年、曾在維也納深造、擔任俄羅斯交響樂團指揮的麥家樂，眼見本港年輕樂手苦無機會，矢志成立一個屬於香港人的交響樂團，為本港樂手提供演出舞台外，更要培養本港交響樂聽眾。
文：葉兆臻 攝：黃文山(部分由受訪者提供)
本港土生土長、現年61歲的麥家樂，音樂緣由入讀聖保羅男女中學說起，「中一學校規定要學一樣樂器，我揀咗小提琴，自此就愛上古典音樂。」對現在的家長來說，中學才學樂器已輸在起跑線，但起步和終點並無必然關係，「好快就知道我想成為音樂家，中六瞞住家人報考香港管弦樂團，考到之後同媽媽講，我唔讀預科、唔要入港大，我要做音樂家。」
麥家樂自此展開全職樂手生涯，「搬去大埔住，除咗返樂團排練，每日七、八個鐘，對住雞、牛練琴。」兩年後到德國深造，展開長達35年旅居歐洲的音樂路，先後入讀德國音樂學院、維也納市立音樂學院，並跟隨名師學習指揮，88年在奧地利二十世紀音樂國際指揮比賽得第二名；93年轉到俄羅斯，其後成為俄羅斯佛羅內斯國家管弦樂團指揮。在98年，已故歌手羅文到當地演出時，正是與他和該樂團合作。
音樂成就遍布半個地球，歸處還是家鄉，「離開香港時嘅夢想，係返嚟香港成為音樂家，依家年紀都唔小，係時候返嚟服務社會……之前雖然人在歐洲，但不時返香港做客席指揮，聽到好多香港樂手講，佢地無機會表演，無機會將音樂成為職業。而家本港兩個職業交響樂團成員大部分係外國同內地人。本地年輕音樂家，幸運由外國返嚟嘅，就去中小學教書；本地畢業嘅只能教私人學生，收入唔穩定。好多人因而放棄音樂路，有人轉做裝修，佢話賺得多啲錢。」
2011年麥家樂返港著手成立交響樂團，他創辦的「寰宇交響樂團」於2013年正式成立，「音樂家一定要演出、要有舞台，先可以提升造詣。成立樂團過程係好困難，主要係場地同經費。我哋當所有音樂家都係職業音樂家，嚟排練、演出，我哋都俾錢，支出係好龐大。」樂團目前有約100名樂手，「樂團成員全部係香港出世嘅音樂家、全部係音樂學院畢業，好期望政府可以支持樂團，支持樂團即係支持香港嘅年輕音樂家。」樂團將於下周二在香港大會堂舉行「麥家樂世界交響音樂會」。
不把香港當維也納
交響樂常予人嚴肅感覺，麥家樂有獨特見解，「呢啲係我哋古典音樂家嘅責任，我哋要用『香港人嘅音樂』去經營寰宇交響樂團，香港唔係維也納，香港係一個流行音樂嘅社會，每個人第一次接觸音樂都係流行音樂。我哋要將呢啲音樂提升做交響音樂，再介紹香港人認識古典音樂，培養一班真係鍾意聽音樂嘅聽眾。」
在俄羅斯曾與羅文合作，將流行曲編為交響樂曲。
「寰宇交響樂團」栽培香港年輕樂手成為世界級音樂家。
【限時激減】800 amFUN 2盒！1200 amFUN 4盒！
