羅淑佩：局長帶領下組成幸福家族 冀為公屋居民帶來幸福感｜Ray Online
政府揀選咗5個樓齡比較高嘅公共屋邨試行「幸福設計」，房屋署署長羅淑佩形容喺局長何永賢帶領下，房屋局、房委會同房屋署團隊組成幸福家族，希望為公屋居民帶嚟幸福感。
羅淑佩接受觀塘區議員柯創盛嘅網台訪問，提到會透過幸福家族，落區去屋邨同長者、小朋友，以至唔同持分者交流，了解佢哋覺得喺屋邨有咩小事會為佢哋帶嚟幸福感。
冀增設施方便長者
羅淑佩舉例話，隨住屋邨樓齡增加，居民年紀同樣增加，社會都有老化趨向，要思考點樣令長者增加幸福感，例如等升降機嗰陣，喺地下大堂以至每層大堂，設置地方畀長者挨一挨、坐一坐。當局亦會思考點樣令屋邨設計上靚啲，令人有家嘅感覺。
幸福構思上，羅淑佩話除咗喺硬件上多花心思，亦希望喺軟件上建立更濃厚嘅鄰舍關係。佢提到自己喺屋邨長大，好懷念細個嘅倫理關係，例如有鄰居幫手照顧長者同小朋友，已經爭好遠。
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
