2023-05-12 16:37:12

Ray Online｜國際名廚慈善宴辦「千歲預宴」 5大名廚與人瑞長者預祝母親節

仲有兩日就係母親節，「國際名廚慈善宴」今日(12日)特別舉辦咗一場「千歲預宴」，為一班年過百歲嘅人瑞，同埋近40位高齡長者一齊預祝母親節！Ray今日亦有幸獲邀出席呢項咁有意義嘅活動，呢場「千歲預宴」匯聚咗本港5大名廚——尹達剛、李文星、黃隆滔、馬榮德，同埋李文基，佢哋炮製咗5道精選菜式，包括花膠松茸螺頭湯、清蒸麒麟花尾躉、鮑魚伴鮑汁壽麵、杞子竹笙扒雙蔬、鮮磨杏汁炖燕窩 / 蛋白鮮磨杏仁茶，畀一班長者品嚐精緻美味嘅粵菜，Ray都食過返尋味。

百年人瑞分享長壽秘訣

席間有兩位年過百歲嘅人瑞，佢哋亦有同Ray分享長壽秘訣。其中，今年102歲嘅馮慧珠育就話，佢每日都堅持運動拉筋，以往亦經常參與義工服務；而今年100歲嘅陳鳳，過往亦係義工服務嘅常客，佢認為保持心境開朗就係長壽嘅重點。

值得一提係，呢場「千歲預宴」仲有一個支持機構，就係中華廚藝學院。院長葉漢鵬仲同Ray講，希望借呢個難得嘅機會，畀一眾年青廚師開拓廚藝視野之餘，亦可以提升他哋對社會嘅關懷，同埋對長者嘅服務精神，培育他哋成為真正「廚德」、「廚政」同「廚藝」兼備嘅新生代廚師。Ray聽完都覺得別具意義，希望主辦單位下年可以繼續舉辦。