曾俊華最近同屋企人去完日本旅遊，包括參觀京都嵐山公園。(曾俊華FB)
日本一向係香港人最愛嘅旅遊目的地之一，前財政司司長曾俊華最近亦都同屋企人搭HK Express(航空公司代碼UO)去關西。佢喺社交網站提到，今次去嘅都係香港人好熟悉嘅大阪同京都，又話不論遊客區定非傳統遊客區，街上面都係人頭湧湧，周圍都水洩不通，仲話如果唔係阿女提早幾個月訂位，呢幾日都肯定冇啖好食。
喺日本撞到唔少在地工作港人
曾俊華話去到唔同地方，隨便舉起電話都可以影到靚相，行程亦包括參觀神社、宮廷同埋大阪心齋橋。唔知佢係唔係欣賞完當地美景有感而發，話一個地方吸唔吸引到人去，要視乎當地社會嘅大環境同氣氛、畀唔畀到市民信任、信心、安心同安全感，「淨係靠烟(煙)花，魚蛋呢啲咁樣嘅嘢，就絕對唔係辦法啦。」
另外，曾俊華又發現喺日本原來唔止容易撞到香港遊客，仲有好多港人喺日本從事服務業，包括酒店有香港服務員、大丸百貨美食廣場都有香港職員，「我諗近年，真係有唔少香港朋友，移居咗日本闖天下。」
立即更新/下載AM730手機APP 體驗升級功能
