Ray Online｜江玉歡被冒認　聯絡「幸運粉絲」指希望對方永遠喜歡她

公眾人物往往成為冒認目標，選委界立法會議員江玉歡最近「中招」。有人冒認佢聯絡「幸運粉絲」，話希望對方一直鍾意佢，仲問對方鍾意佢啲咩。

江玉歡發出嚴正聲明，話近日發現有人盜用佢嘅相同個人資料，喺社交媒體同埋通訊程式偽冒佢開設虛假帳戶，仲用佢嘅名義同市民交流對話。由截圖見到「江玉歡」主動聯絡粉絲，當粉絲問「江小姐有甚麼指教？」「江玉歡」用簡體字回應「只是花了一些時間來欣賞我的粉絲並看看他們對我的看法。你是我的幸運粉絲之一，今天可以和我聊天。謝謝你喜歡我的主頁，支持我，我希望您永遠不會停止喜歡我……您真正喜歡我甚麼？」

呼籲政府加強打擊網絡詐騙

江玉歡話對於呢種惡行，深表痛惡同痛心。佢提醒各位市民提高警覺，小心呢類訊息，唔好輕信假帳戶發布嘅內容，防止受到欺詐。另外，江玉歡話佢同市民最近收到大量推銷電話，仲有透過各種通訊工具進行嘅各類網絡詐騙行為，嚴重影響市民生活，令人擔憂。佢呼籲政府正視問題，採取有效措施，加強防範同打擊網絡詐騙行為，保障網絡安全同市民嘅合法權益。