羅淑佩進駐小紅書，網民留言冀邀請Taylor Swift等來港演出
今屆政府官員更積極善用社交平台增加同市民嘅交流，文化體育及旅遊局局長羅淑佩更加擴大「版圖」，近排進駐「小紅書」。好多網民紛紛許願，希望局長可以邀請國際巨星Taylor Swift等嚟香港演出。
羅淑佩近排加入「小紅書」，喺上個月28號首次發文，標題係「你好，認識一下」，同內地網友打招呼。佢暫時已經有3個帖文，同大家介紹自己嘅「小紅書」新頭像，仲有分享生活相，見到佢喺哈爾濱包到實一實，但係手拎住雪糕，話「寒冷天氣吃雪糕，好滋味！」
網民希望局長邀請巨星來港
由於羅淑佩係文體旅局局長，網民把握機會，直接留言反映願望。網民希望局長爭取國際巨星Taylor Swift、南韓女團「少女時代」、南韓男團「BTS」等嚟香港表演；又有網民話希望今年可以睇到張敬軒喺紅館開騷。除咗文體旅事宜之外，有網民提到雖然羅淑佩升咗官，亦希望佢繼續關注濫用公屋情況。
入App免費拎荷花BB展入場券
