Happy hour過後，總希望搭下老闆或同事的順風車，免卻逼人、逼車、轉地鐵之苦，在私家車舒舒服服直達家門口。不過，請緊記老闆同事不是的士或Uber司機，基本坐車禮儀還是要學識，否則辦公室得罪人外，甚至可能被網絡公審：「當人係司機啊？！」
職場順風車禮儀問題，每隔若干時間就有人提起，一名網民日前在論壇抱怨：「今晚載3個同事返屋企，放低兩個之後，剩番一個90後同事喺後座，佢基本禮貌都唔識，無坐上車頭。當我司機咩？」大部分網民均認同，無論搭老闆或同事順風車，應該最少一人坐前座：「一定要補位，唔好當人係司機，除非佢真係你司機。」有人提出同年紀無關：「唔好標籤90後，我90後都識。」亦有網民提出例外情況，「差5分鐘路唔通又要落車上車咩。」另有人提出：「同事好客氣好有禮貌，一定有個坐前面。不過，成日喺架車度食嘢煲煙，雖然開窗都有味！」
儘管大部分人認同應該坐前座，但也有例外，本身是車主的民主黨立法會議員尹兆堅指，「我真係無所謂，有時會叫助理同朋友坐後座添，香港車位咁窄，泊車後前座會難落車，又方便我放袋、文件喺前座。」但他稱遇過「唔太順路」人士，「要兜多十幾廿分鐘囉，如果有傾有講吹吓水都無所謂嘅，通常唔好拒絕人啦。」
同樣有車的西貢區議員方國珊，認同「職場禮儀最好遵守啦，以前都試過揸車接載朋友或者街坊，佢哋坐咗後座，唯有婉轉啲叫佢：『不如坐前面啦，方便傾偈啊。』有時都幾尷尬；如果對方係年輕人，都會話俾佢聽，坐前座係禮貌，有啲年輕人係唔知道要咁做，同佢講通常都肯聽嘅。」
經常到公私營機構講授職場秘訣的心理學講師周朗認為，大部分情況都應該坐前座，「無論對方係同事或老闆，出於友好或者尊重角度，都應該坐上前。呢啲係約定俗成嘅規矩，就算本身唔知，都應該有覺察力去學習。遇上例外情況，不妨主動問『坐前座好無啊？』再判斷實際應該點做。」他又提醒，中國人社會較看重尊卑文化，員工不應疏忽，「舉個例，就算載人嘅同事，真心唔介意你坐後座，但俾其他人或老闆睇到，知道你唔識做，咁點算，咁就『躺著也中槍』。」
順風車基本禮儀：
「真係順路先好」─—地球是圓的，但順路與否還是有依據，新界東和新界西同屬新界，但明顯不順路。
「同事唔係司機」─—座位次序很重要，把同事當成司機？人際關係係咁先；將老闆當成司機？份工係咁先。
「請勿大力閂門」─—私家車一般毋須大力關門，保持禮貌和得體，不要嚇車上人士一跳。
「勿吸煙飲食遺留垃圾」─—除非私家車是閣下擁有，否則搭地鐵和巴士不會做的事，請不要在車上進行。
「寧人等車，莫車等人」─—一個人比四個轆機動靈活，盡量不要讓車等人，除非是老闆。
立即更新/下載AM730手機APP 體驗升級功能
