![謝君豪開大師班傳授影帝級演技 ANSONBEAN檢討演技不足戒壞習慣](https://cdn.am730.com.hk/s3fs-public/styles/article_image/public/2024-07/5a82c556-d1c1-47b2-b36e-d6c28c55770e.jpg?itok=hGHzv5Gr)
影帝謝君豪演而優則教,最近開辦大師班授徒。
影帝謝君豪從影多年獲獎無數,演技毋庸置疑。豪哥亦演而優則教,最近特意抽空開辦大師班授徒,指導一眾新演員演技,當中包括劉沛蘅(Hillary)、陳毅燊(ANSONBEAN)、陳紫萱(Summer)、林熙彤(Hazel)等。日前十堂的演技課圓滿結束,學員們難得獲影帝賜教,都非常榮幸,亦感激豪哥傾囊相授,而見證學生們的蛻變,豪哥都非常自豪,猶如成就解鎖:「佢哋每個人都有唔同嘅成長,呢樣嘢令我感覺打咗支強心針,即係自己教導都有啲成果,好似少少成就解鎖!」
大師班最後一堂,豪哥及助教陳錦龍導演,跟學員們檢討學習成果,並勉勵大家,眾人依依不捨一起拍照留念,更向豪哥送上感謝信,令到他相當感動:「教書好開心㗎,首先第一樣嘢就係溫故知新,做演員好基本嘅嘢,自己教書嘅時候會諗返,然後提醒返自己,教學相長我覺得好有意思,第二樣嘢,就係睇到佢哋嘅成長,真係好開心同埋感動。」12位學員包括:Hillary、ANSONBEAN、Summer、Hazel、陳伊霖、鄧沛楠、黎紫琦、范明𤋮、鄧啟軒、梅維瀚、管鋈及雅霖,當中不少人都有幕前經驗,亦有部份學員是素人,年齡由19歲至40多歲,橫跨不同年齡層,豪哥讚賞他們每位在最後一堂結業表演都有突破,令他自豪感到成就解鎖:「尤其係冇經驗嗰幾位,我真係由開頭佢哋第一堂上堂,好似好冇自信,講嘢好細聲,到而家最後一堂,我覺得睇住佢哋嘅自信慢慢上嚟,我覺得呢樣嘢比任何嘢都重要,真係有少少做老師安慰嘅感覺。」
![謝君豪指導一眾新演員演技,在培育演員上相當有心。](https://cdn.am730.com.hk/s3fs-public/styles/article_image/public/2024-07/db8dfcb6-9cb8-44d2-a4fc-e0fb47bac59b.jpg?itok=mWf47-2k)
謝君豪指導一眾新演員演技,在培育演員上相當有心。
早於2016年,謝君豪就經已在香港浸會大學電影學院擔任客席講師,相隔多年又再執教鞭,皆因豪哥之前參與演出時,遇到一班非常好學的年青演員,另外一直都有不少人主動叩門求教,豪哥決定藉住最近兩個多月的空檔,開辦這個10堂大師班,他又補充指開班另一原因,是自覺有份傳承的責任:「做咗行業都好多年喇,其實我之前係好多前輩教過好多嘢,嗰啲唔係書本嘅嘢嚟,而係身體力行嘅經驗,我覺得我都應該有責任分享出嚟,因為理論上嘅嘢,其實係睇書可以睇到㗎 ,你買本書都睇晒講晒㗎,頭先我都同佢哋講,我話其實你哋上堂主要係分享一啲我對呢個演出嘅睇法,你嘅老師對呢個演出有咩嘅獨特嘅體會,獨特嘅經驗,呢樣嘢先係最重要。」
![謝君豪滿意學員表現,大讚他們有心又有天份。](https://cdn.am730.com.hk/s3fs-public/styles/article_image/public/2024-07/94871b6e-3467-466f-8521-cb2c6ec129cb.jpg?itok=D5JhQEXm)
謝君豪滿意學員表現,大讚他們有心又有天份。
謝君豪滿意學員表現,大讚他們有心又有天份,但對學員來說,豪哥認為最重要還是有機會給大家實踐:「佢哋最缺乏嘅就係機會,其實一定要做得多,即係拳不離手,舞台劇又好電影又好,最緊要做得多,所以要多啲機會畀佢哋,喺度呼籲啊大家(業界)都用多啲年青演員呀。」問到會否再開班,豪哥虛心指要先收集一班學生意見,檢討今次課堂內容,至於如何可以加入「謝家班」,豪哥笑著回答:「好容易㗎咋,交學費,哈哈哈!其實最緊要就係你鍾意咯,因為好辛苦,除咗課堂之外,你仲要花好多時間去排戲啦同對手夾啦,仲要返嚟做功課畀我睇,仲要當眾執戲㗎,如果你唔鍾意嗰樣嘢,冇嗰個熱情,你可能覺得係一種負擔。」上堂後,12名學員齊齊宴請豪哥,謝師宴上大家一同舉杯慶賀畢業,又在席間互相交流課堂表現。學員們能夠從影帝兼劇帝的身上學習,都異口同聲獲益良多,Hillary:「因為我嚟緊都要演舞台劇,今次呢十堂學嘅嘢,我覺得好幫到我,去分析我嚟緊工作嘅一啲角色。」ANSONBEAN就話:「我發現自己都有好多好多嘢要戒,尤其係我可能行路好多小動作,都令到自己甩唔到自己嘅角色,我要繼續去努力,去做好佢。」Summer亦大讚豪哥的教授實用,跟過往自己準備演出方法不同,Hazel就指在課堂上首次接觸舞台劇劇本,直言跟拍戲大相逕庭,今次增進不少知識。至於分別是全班年紀最細和最大的鄧啟軒及梅維瀚,都各有得着,鄧啟軒說:「我喺豪哥度學到點樣動心,一個角色係可以打動到自己嘅心,思考下我同角色有咩性格上相似,呢點我從來都冇學過。」梅維瀚:「我其實教唱歌教咗廿幾年,今次係我第一次上acting class,演技班入邊畀到好多靈感我,點樣可以inspire自己學生,點樣將佢情緒再develop再擺喺歌曲入面,呢點對我嚟講係最大得着。」