![麗英推出傷感情歌《解咒說明書》,是她較少展露的傷感面向。](https://cdn.am730.com.hk/s3fs-public/styles/article_image/public/2024-07/1d365617-92cc-418b-b0a4-17d3626084dd.jpg?itok=XzsoSrar)
麗英推出傷感情歌《解咒說明書》,是她較少展露的傷感面向。
麗英既是演員又是歌手,在鏡頭前大家總能感受到她的歡樂,一直以來推出的歌曲以跳脫輕快為主。繼年初的《美男子圖鑑》後,推出新的情歌《解咒說明書》,是麗英較少展露的傷感面向。歌曲靈感來自於她自己的感情經歷,為了製作這首歌花費了6位數字,更前往日本拍攝MV。麗英表示今年將會推出「愛情三部曲」,講述自己在愛情中的不同狀態,而這次新歌是第二部曲,主題圍繞着「療傷」,描寫她受到情傷的狀態。麗英說:「第一首《美男子圖鑑》講對愛情嘅憧憬,喺花多眼亂嘅世界選擇自己鍾意嘅人;《解咒說明書》就係講緊受情傷嘅狀態,喺復原中階段嘅情歌。另外,『愛情三部曲』歌名都有設計過,全部都係同書有關,大家可以期待一下!」
![麗英新歌花費6位數製作,更前往日本拍攝MV。](https://cdn.am730.com.hk/s3fs-public/styles/article_image/public/2024-07/e9bea9dc-b9ca-4901-b350-82e2720c05d0.jpg?itok=pQKS3b-h)
麗英新歌花費6位數製作,更前往日本拍攝MV。
對於《解咒說明書》,麗英表示:「我曾經喺一段關係裏面俾人嫌棄過,其中一個分手理由係嫌棄我着太多T恤牛仔褲,呢件事都令我非常傷心。後來,我發現一個人唔鍾意你,其實乜嘢都可以成為理由。我相信好多人都試過喺愛情上被人嫌棄,例如唔夠上進、身形唔靚之類,所以,我希望呢首歌可以安慰有相似經歷嘅人。任何人被嫌棄都會唔好受,我都經歷過自信心低落嘅時期,但之後明白到自己價值應該係由自己而定,最緊要係識得愛自己。」這次更是麗英首度到日本拍攝MV,找來了《全死角美少女戰士》的導演Christopher再次合作,她說:「今次係我第一次喺日本拍MV,期待咗好耐,終於做到了,實在得來不易!因為我哋預算同時間都有限,計埋來回機程只係用咗三日時間,同埋要走12個景點,所以時間係非常緊湊。」導演Christopher安排了一個情節,講一個失戀女仔好努力做運動,借打拳幫助自己療傷。事後,導演才得悉原來麗英會打拳,麗英說:「因為去年開個人音樂會關係,我特登去學打拳,幫自己唱歌練氣,冇諗到拍MV派上用場,仲有機會見識到日本拳館。今次仲要多謝導演安排咗個靚仔日本教練陪我打拳,好彩之前打咗一年,連教練都讚我個直拳幾好。」
此外,MV有幾場麗英傷心爆哭的場口,其中最令她最深刻的是:「有一場戲我要喺隧道入面抱頭痛哭,隧道上面就有一條鐵路,我哋為咗令個畫面靚啲,所以特登睇時刻表去捕捉列車經過,但係同時要hold住傷感嘅情緒。好彩拍咗1 take導演就收貨,如果唔係,我哋要等多一個鐘先有另一架同款列車。」