剛扶着患有退化性膝關節炎的母親步出診症室後，你卻連忙折返與骨科醫生單獨交談。
你：其實我媽係咪應該早啲換骹呢？我見佢愈來愈唔想出街，成日行兩三個街口，膝頭就痛到要搵位坐。
醫：由我第一次睇佢時，佢膝頭嘅變形已經十分嚴重，而X光亦都證實，佢膝關節退化嘅程度屬於後期。當佢試過哂唔同嘅非手術治療，例如係止痛藥、物理治療、自己做運動同埋打透明質酸等，都唔能夠改善佢嘅膝頭痛同活動能力嘅話，我會建議佢做換骹手術。
你：我勸過佢好多次，但佢話如非必要，都唔想換骹，因為怕手術有風險。
醫：事實係，任何手術都有出現併發症嘅風險，只係換骹嘅成功率，遠高過併發症嘅發病率。例如超過90%病人，換骹後膝頭痛都得到顯著改善，甚至乎唔再痛；而超過80%嘅人工關節，壽命都超過25年以上。至於術後傷口感染嘅機會大概1%，而較嚴重嘅人工關節感染更少過0.5%。
正說着的時候，醫生卻凝視着你手中，在候診時閲讀的一本書。
你：醫生你有冇睇過依本《被討厭的勇氣》？本書教人要學識「課題分離」，唔好干涉人哋嘅課題，咁樣就可以減少人際關係之間嘅紛爭。正如換唔換骹，係我媽嘅課題同選擇，因為依個決定嘅結果，最終都係由佢嚟承受。就好似書中嘅比喻所講，你可以將隻馬牽到水邊，但無辦法強迫佢飲水一樣。
醫：無錯！就算醫生建議病人，換骹係最合適嘅治療，但病人接唔接受，講到底都係佢嘅課題。不過盡力將手術風險減到最低，當然係醫生嘅課題啦！
你：書中又提到心理學上嘅「目的論」，意思係人其實唔係受制於過去而行動，而係向住自己決定好嘅目的而行動。搞到我有啲擔心我媽，或者佢並唔係因為手術風險而唔想做，而係因為唔想做手術，而不斷去搵好多理由同藉口。
醫：心理學就唔係我專長，但因為成日見病人同家屬，所以都略略明白到長者嘅諗法：通常一係佢哋唔想仔女洗錢喺私家做手術，寧願自己捱苦，喺公立排夠三五七年先換骹；一係就發現當自己行得唔好時，仔女好似特別關心自己，結果潛意識裏面，想一路維持住患病嘅狀態。佢哋嘅目的，可能都係出於愛，同埋渴望被愛。
你：就咁聽落去，一個人要更換自己嘅固有思想，查實比起醫生你換骹更加難，需要拎出更加大嘅勇氣！
醫：換骹可以令長者餘生唔洗再困係屋企度，但唯有心意更新而變化，先能夠解開人心裏面，作繭自縛嘅枷鎖，喺思想嘅囚牢中得到釋放。
你聽後沉思了半晌，幾乎忘記了門外的母親，正等候着你摻扶回家。