卓亦謙與《年少日記》
將於11月25日(周六)在台北舉行的《第60屆金馬獎頒獎典禮》，本月初公布入圍名單，由新晉導演卓亦謙(阿卓)自編自導的《年少日記》總共獲得5項提名，包括最佳劇情長片、最佳新導演、最佳原著劇本、最佳男配角和最佳剪輯。而它更是唯一一套港片角逐最佳劇情長片，屆時會與日本的《石門》、馬來西亞的《五月雪》、台灣的《疫後》和《關於我和鬼變成家人的那件事》4套作品一決高下。
雖然距離《年少日記》11月16日的正式映期尚有差不多一個月，但因為它是今屆「香港亞洲電影節」(HKAFF)的開幕電影，加上電影公司mm2香港近日亦安排了幾場優先放映，令部分觀眾可以先睹為快。有得入場搶先看的朋友，散場後都忍不住在Instagram發帖表達感受，有的說「喊到隻眼腫晒」(特意搜尋一些網民帖文來看，很多人都這樣說)，有的說「唔劇透去討論呢套戲好難」。
事實上，若果只憑1分44秒的官方預告，只會知道一些跟故事有關的零碎資訊──飾演中學老師的盧鎮業，某天得悉班上有學生寫遺書想自殺；之後他向飾演學生的周漢寧說：「我未必幫到你，但我會陪住你！」飾演主角的黃梓樂，因為看漫畫給飾演父親的鄭中基用藤條抽打，而飾演母親的韋羅莎則怪責黃梓樂因為沒有好好溫習，最終無法帶他一起去旅行──到底這些細節如何編織成《年少日記》整個故事？我認為這種壓抑和哀傷感覺，連同畫面和配樂營造出來的神秘氛圍，正正是使人好奇，渴望入場一看究竟。
此刻人在異鄉，仍未有機會看到《年少日記》，但心中已有很多問題想知點解，當中最想知道的是：為何第一次執導長片(第五屆「首部劇情電影計劃」大專組得獎作品)，就要拍如此沉重的題材？所以飛往倫敦之前幾日，特意抽時間跟阿卓面對面談了一會，原來《年少日記》的故事靈感，來自他的親身經歷。
「呢個故事嘅概念係嚟自我一段好深刻嘅經歷，就係我大學時期有個朋友輕生走咗，呢件事帶俾我嘅影響就係，我開始去反思應該點樣去對待身邊嘅人，過程裏面我睇好多關於自殺嘅新聞……(發現)有時有啲人會都好批判呢啲輕生嘅人，或者作出呢個選擇嘅人，有啲會話『佢抗壓能力好低』，有啲又會話『你好自私啊，冇諗屋企人感受！』但對我嚟講，我覺得唔係㗎，(因為)嗰個人已經崩潰咗喇，佢都搞唔掂自己，點去要求佢喺嗰個moment仲要達到某一啲人對佢嘅期望？我就好想寫個故事去探討呢樣嘢。」
「同埋我朋友嗰件事，真係令我意識到，原來你身邊嘅人可以前一日表面冇事，好哋哋㗎，但係第二日朝早佢就突然間咁樣走咗……我哋人一生流流長咁耐，邊有可能幾十年每一秒都係好開心啊，唔開心就一定要講出嚟(年少日記)呢個故事想帶出嘅message其實就係呢樣嘢，即係裏面角色鄭Sir(盧鎮業)，佢知道自己嗰班有學生唔開心，好想去關心佢哋。但係佢就發現原來佢都有一啲成長嘅經歷未overcome(克服)到喎，於是佢就要面對，最終其實就係講你想關心人之前，你都要識得去愛惜自己，去錫自己。」