姜濤首映之亂解密
《我的天堂城市》香港首映之亂有二，一是贊助商深夜宣布與發行公司Medialink割席，二是一眾女士衝上台與姜濤自拍，畫面震撼所有人。
到底發生了甚麼事？
好多報道話係「姜糖衝上台集郵」，事實上佢哋點止係姜糖咁簡單，當日台上主持介紹佢哋係「15位聯合製作人」，即係有份投資部電影嘅。以往投資電影一般都會係公司，就算係個人，都會係電影界嘅大老闆，今次可以話係「引入散戶」嘅做法。仲要一部片有15個製作人，可以話係大開眼界，莫講話呢一類文藝片，就算商業大片亦少見。
一般電影，無論有幾多出品人投資方，通常都有一個大莊，佔最多股份，決定套戲嘅發行宣傳等，今次睇嚟就係一間叫MM2滿滿額嘅公司，而Medialink睇嚟就係負責發行，即係呢個首映嘅嘢，都係呢兩間公司話事。江湖傳聞有人將股份賣俾呢「15個製作人」，幾多錢就冇咩人會知。
點解要咁做呢？
雖然話係散戶，「15個製作人」夾埋份錢，投資額分分鐘多過一間公司㗎。尤其班散戶冇咩投資電影嘅經驗，有理由相信佢哋唔係好知價，為咗支持偶像就幾多錢都俾，亦唔計較票房，上台嗰下咁近見到偶像，已經係最大嘅回報(所以搏命影)。至於賣股份嗰個呢？收咗錢之後，唔使俾佢哋話事，又唔使擔心票房，仲唔使將「製作人」嘅錢同其他股東分，自己袋袋平安。
講到呢度，咁有咩問題先？又冇規定唔可以俾散戶投資嘅。大家睇當日安排就明白問題所在，安全問題、觀感問題同令人誤會所有姜糖都係咁嘅問題。當然你可以話，呢啲係個人行為，主辦方都未必預計到，但當日有份安排流程嘅就好難推卸，點解現場冇人維持秩序？容許宋芸樺等演員被人彈開晒？姜濤被人逼到埋backdrop？藝人同佢哋嘅經理人公司要繼續喺呢一行打滾，又要得體，就算嗰日俾人蝦，敢怒都不敢言；唯獨贊助商唔使理你，嬲到當晚發聲明割席，你就知在場有幾多人睇到眼火爆。