床哥借Edan@MIRROR嘅感情事，為自己組合成為叱咤「我最喜愛」拉票，姜濤@Mirror為隊友發聲直斥「無品」，成為上星期娛樂圈最大花生。我無意討論誰是誰非，反而想由每個單位嘅心理角度出發分析下件事。帶定個頭盔，以下完全主觀。
1/ 床哥：係一個好聰明嘅人，口才好好，轉數亦都好快。我相信佢一開始真係覺得Edan件事好好笑，寸下佢其實無傷大雅；但後來變成對立嘅氣氛，我覺得佢心理上可能有轉變，由講笑變咗好勝。口才好嘅人通常都好辯，唔易認輸，由佢喺自己IG加「有品」二字可見。
雖然件事對MIRROR整體冇咩傷害(其實仲可能令鏡粉更團結投票)，但心地係咪完全冇問題呢？或者未去到「冇品」，但就好難話係善良、尊重人嘅表現，亦好難話唔係自我中心嘅投機心態。畢竟，佢IG人數直線上升。
床哥、姜濤罵戰，商台發達。
2/ 姜濤：佢其實好得意，有時啲行為成個細路咁，有時又會對一啲事好執着。我覺得佢嘅出發點，好純粹係正義感，不忍隊友被抽水。姜濤口才同轉數未必有床哥咁快，加上偶像呢個身份本身就係蝕底。你可以話佢蠢，但我覺得姜濤嘅行為唔係扮有型，而係展現佢嘅原則同價值觀，當然亦有人形容係「死牛一邊頸」。
3/ Edan：明明被人影到搭晒膊頭行街，都仲話係「努力中」，我肯定Edan知道對個人形象會有影響，但點解仲咁講？就要先分析下另一個人(可能)嘅心理狀態：
4/ 林明禎：作為唔少男士嘅「女神」，拍拖會唔會令男fans理想幻滅，女仔又當佢係情敵？最終會唔會冇晒啲廣告？多次外遊仲俾你搭埋膊頭，但就寧願解釋係遮住「頭上三把火」都唔認愛，男fans仲可以保存一個可能性：或者真係朋友呢。
5/ 若以上分析成立，咁Edan就係戇居，當然係出於保護女方，唔想佢受到攻擊。
成件事Edan同姜濤都係處於下風，緣於保護其他人多過自己。或者佢哋係蠢、入世未深，但心地一定唔係邪惡。其實善良同真實，縱使有缺陷，唔係MIRROR一直嘅獨特之處咩？
6/ 商台：發達囉！