認真認識「世界認真組織」
演算法下無「大台」，意味只要願意「落場玩」，就隨時有機會贏。所以一直以來加入「YouTube戰場」的後輩與新晉可謂前仆後繼，但真正能夠做出成績、讓網民記得甚至「噏得出」大名的頻道少之又少。以下介紹的「世界認真組織」(World Serious Organization，簡稱「世認」)，是近年冒起得極快的本地網絡新星。
自2023年8月18日開台，短短一年半時間，「世認」在YouTube頻道推出的自家短片超過270條，累積訂閱人數為6.54萬，Instagram那邊更瘋狂，截稿那天(1月16日)已發布的帖文總數為245篇，追蹤人數為30.4萬。「認真」乃平台創立宗旨，由一支鉛筆可以寫幾多個字，到一塊擦膠可以擦幾多個字，總之愈無聊的事求證愈見認真，結果愈認真就愈多忠粉，尤其係年輕一輩。
自發實測的「認真研究」短片之外，與其他單位合作同樣多不勝數，2024年話題作有二：5月初上架、「流量密碼」林家謙為宣傳4月派台的單曲《喃嘸師感官漫遊》，專誠去到「世認總部」實測唸誦《般若波羅蜜多心經》速度可以有幾快；去到10月初，就連「真正大台Icon」aka「汪阿姐」汪明荃亦在「世認」華麗登場，與「世認」兩大台柱Sam Lam和Curtis Law密密斟咖啡，推廣11月舉行的兩場紅館演唱會。另一個不得不提的是，11月2日他們在旺角朗豪坊舉辦實體比賽「第一次世界認真『黑白』大戰」，獲邀參加明星賽的歌手和現場招募的街頭選手總共過百人參與，場面墟冚。從上述幾個例子可見，《世界認真組織》絕對是繼「小薯茄」招牌系列《雪櫃冷笑話》之後，另一個深受大眾和業界歡迎的網絡節目。
「世認」實力獲市場肯定的另一例證，是「世認孖寶」殺入電視圈，為近日推出的ViuTV新節目《佛系迎新小隊》擔任主持，夥拍「香港兒童節目代表人物」譚玉瑛(姐姐)以及「ViuTV小花」許寶恆(Alice)，來個「三台聯乘」──譚玉瑛曾回覆《香港01》查詢時指，現時與無綫電視仍有合約──兼「跨代合作」；上周四(1月9日)Sam更以舊生身份，獲邀擔任母校聖類斯中學的歌唱比賽嘉賓，與Curtis一同唱歌。「世認」上位值得關注，所以我決定要認真認識這個從未接受過任何媒體訪問的「神秘組織」。
首先整理一下「世認」的基本資料：第一條短片是〈認真研究！你支唇膏用到幾多次？〉；現時逢一、三、五出短片，長片則大概每月一至兩條；根據《年度報告2023-2024》，第一年他們總共製作多達153條短片，總拍攝時數為1,927小時又21分鐘。團隊現時有六位成員，包括三位主持，其實「表妹」Victoria自第一天開始已在「組織」裏負責幕後工作，直至2024年9月25日〈認真研究！邊種交通工具過海最快？〉才首次走在鏡頭前；現時睇片必定聽到的「為咗認真對待今次嘅實驗」並非第一集就有，是第四條片、2023年8月25日上架的〈認真研究！一嚿擦膠擦到幾多個字？〉背後原來有段故。
阿Sam解釋：「點解無端端加嗰句嘢呢，因為我哋本身測試緊擦膠擦到幾多個字，咁點樣試到有幾多個字呢？我哋喺測試之前，我哋先寫咗一堆字，咁跟住嗰陣時就度咗一句類似tag line咁嘅嘢，就係『為咗認真對待今次嘅實驗』，我哋係做咗啲pre-production嘅，就係寫字喇。個情況我都覺得係癲、好誇張、好認真，我哋為咗個擦膠實驗，再做多咗個鉛筆實驗，嗰個力量就好似多咗一層，勁咗咁樣，然後慢慢就發現『為咗認真對待呢個實驗』其實可以每一次都講，一嚟大家會易記啲啦，二嚟就係佢好似變咗我哋為咗呢個實驗有啲preparation要去做，感覺件事係認真咗。」有趣的是，阿Sam提及的這條鉛筆測試〈認真研究！一支鉛筆寫到幾多個字？〉沒有緊接擦膠測試推出，要去到2024年6月12日才上架。
重點來了，究竟當初「世認」是怎樣誕生的？原來Sam跟Curtis以前在同一家廣告公司任職，後來轉到新公司繼續做同事，碰巧有次為廣告客戶「度橋」，愈傾愈興起，就成為「世認」的雛形。Curtis說關鍵在於，他與Sam都是「認真底」：「因為我哋兩個都係好奇寶寶嚟嘅，即係日常見到好多嘢都有個疑問，即係好似《十萬個為甚麼》咁，點解會咁？其實嗰樣嘢係幾多呢？幾大呢？邊樣嘢係最乜乜乜呢？譬如一個早期嘅諗法就係動物餅，成日喺盒背呢都見到個圖鑑，其實一盒裏面齊唔齊㗎？我要幾多盒先儲得齊？跟住發現大家都有呢個疑問，但係就冇人做過(測試)出嚟囉，諗諗下就不如……既然咁辛苦嘅嘢冇人做，咁就我哋做囉。」
關於測試和驗證，天下間有千千萬萬種方法，「世認」就堅持既要貼地又要好睇，令觀眾有得着，Sam舉例：「譬如話一支唇膏可以用到幾耐，可能(坊間)有好多唔同嘅測試方法嘅，但我覺得最貼地嘅方法就係搽囉，搽完之後錫晒喺塊玻璃度，咁咪可以present到成個實驗結果，起碼都俾人大概知道原來一支唇膏可以錫咁多次、搽到咁多次，咁就有個參考，就kind of叫做實用啲囉個資訊。」有得必然有失，「世認」做出成績固然值得開心，但拍片從來非常累人，Curtis以「攰」的語氣表達箇中的又愛又恨：「我哋由開台到而家，年半都冇放過假……一個禮拜出三條片，咁講好似有啲自虐，講真係規則嚟嘅，呢個規則係令到我哋……我唔想講成功，但係我哋個台點解會有啲人睇，其實都幾倚賴呢個schedule……恆常地出片，其實對拍片世界嚟講係好重要。」