「Stop making stupid people famous」這句說話，就像兒歌《小老鼠與大花貓》裡面的花貓一樣，老是在網絡世界出現，提醒著大家博上位的蠢人不值得出名。奈何偏偏今時今日能夠紅得起的，八成都是這句說話意義下的蠢人。
TVB資訊節目《呃錢》第一集出現的黃先生，好應該列作這種蠢人的樣版。節目裡面，黃先生以苦主身份亮相，講述自己如何墮入婚介公司的騙局。直指雙親年紀大想抱孫、一直單身的他表示，有日在小紅書出post話想識女仔，隨即吸引多間婚介公司主動聯絡。之後，他就到深圳福田與其中一間公司職員面談，他指自己要求不高，只想找個人肯結婚生仔，惟外貌想「10分入面有7分」；最後他不敵對方遊說攻勢，花了兩萬多元購買相睇套餐，豈料配對服務及相親對象貨不對辦，自覺受騙。
受騙固然慘，但不足以令他成為城中熱話，不然所有上過《東張西望》的苦主都要變成網絡紅人。黃先生會紅，是因為明明是受害者卻表現得自信爆棚，一句「我有baby face，點會冇市場？」更是令人側目，而TVB方面亦有落重藥，上載了一條未曝光片段到網上，片裡面的黃先生不但口花花撩主持梁敏巧，仲要唱麥浚龍的慘情歌《沒有人》，擺明搞笑。後來，黃先生更黐埋「抽水王」林作拍片，公開宣布追求梁敏巧，更揚言要在30日內得手：「我鍾意佢夠高，鍾意佢教瑜伽，多姿勢！」
玩咁大，實有記者會問梁敏巧回應，而女主角亦轉個頭就拒絕了「Baby Face」黃先生，仲話自己襯不起對方，並會拭目以待這30日有甚麼花臣。相信好多人都會好似梁敏巧一樣，期待Baby Face之後出招，但有不少人就覺得整件事就是無聊人做無聊事，似蒼蠅般討厭，不應助長，不該關注。你以為你唱反調，Baby Face就會收檔？好難喇，只要仲有觀眾捧場，覺得他派的「花生」夠滋味，佢就自動自覺用不同渠道繼續「表演」落去。
想消滅這班蠢人一定要用非常手段，這裡當然不是提倡大家做違反道德、法律之事，而是建議將「If you can’t beat them, join them」的精神發揮到底。大家仲記得「何太」嗎？亮相《東張西望》爆紅之後，她與「何伯」挾著人氣漸趨高調，不時開live「講經」大放厥詞，結果連番被爆涉嫌重婚、疑似曾被刑事拘留等黑歷史，更可能會被房屋署收回公屋，認真大快人心。這種蠢人，就是會在大家追捧的過程中不斷自我膨脹，終有一日會頂不順爆炸，簡單講就是「自有天收」。我確信Baby Face好可能會落得如此下場，如果他不趁早收手的話。