中環呢個核心商業區，到處人來人往，想搵個地方靜靜咁休息下真唔容易，但Ray最近有新發現，呢個就係市建局重新設計翻新，佔地達到2,660平方米嘅「H6 CONET」社區共享空間，Ray要同大家推介一下。
坐落中環中心地下的「H6 CONET」共享空間，於去年10月底已經開放予公眾使用，呢度四通八達，打通咗附近6條街，包括鐵行里、興隆街、同文街、永安街、機利文街同機利文新街，希望可以匯聚各方人流。而且佢個名都好有意思，CONET呢個字嘅靈感，就係源於Community（社區）、Open Space（公共空間）及 Network（網絡），目的就係提供一個「連繫社區 讓市民共享」嘅空間。
呢度仲好有藝術氛圍，幾個月以來已經有唔同團體租用呢個空間，舉辦文化展覽同小型表演，就好似去年底舉辦嘅「2017港深城市/建築雙城雙年展」，而之前就有社企「愛連心基金」舉辦「『帶』路同行」展覽，聽講市建局仲贊助埋場地同鼓勵同事一齊做善事，真係相當有心。另外，係呢個空間仲有七幅藝牆，都係出自本地藝術家嘅手筆，用中西區嘅街道特色做創作主題，其中一幅名為《快樂日常》嘅藝牆，就係聽障展能藝術家同本地插畫師嘅作品，用活潑可愛嘅畫風去表達中上環簡單快樂嘅日常生活，等市民可以加深了解社區嘅歷史及生活故事。
喺「H6 CONET」裡面，仲有市建局重新設計嘅「市區更新探知館」，引入唔少新科技，好似AR擴增實境、體感遊戲等，加埋板間房、籠屋同「閣仔」舊區實景體驗，等市民可以體驗下舊區居住環境同市區老化問題。
