阿珊間公司舊年生意麻麻，老細為咗節省開支，就出動內部審計去睇吓邊啲地方出問題。一輪審計功夫後，佢哋出咗份十幾頁紙嘅「節省」方案，其中包括刪除半年一次嘅滅蚤。阿珊話冇咗滅蚤，佢對42吋白滑長腿一定保唔住，成腳起晒梅花點。另外，審計部話要將兩人坐嘅工作長檯變成3個人用，咁公司就可以騰空其他地方出嚟擺貨，慳返唔使租迷你倉。審計部仲叫啲同事唔好帶咁多私人物件返公司用，以免增加公司電費。
阿珊即刻去搵審計部阿頭Ka姐講數，阿珊扯晒火話：「你同我地計？公司有蚤，公司有責任滅蚤，一次都不能少。仲有，我哋啲檯咁逼點坐3個人呀？幫電話充電又用得公司幾多電費呀？」Ka姐就好滋油咁喺電腦開咗啲相，佢話：「審計部同事上兩個月幫公司每個角落都影晒相分析，你個位係其中一個重災區，枱底有3對高跟鞋、一對拖鞋、一對波鞋，其中有兩對鞋起晒霉菌，有一對臭到個影相嘅同事出現幻覺，以為自己去咗堆填區！」
Ka姐再開另一張相：「嗱！我哋發覺你個垃圾桶冇咩垃圾，但係垃圾桶周圍就有好多垃圾。由於你習慣求其掟，搞到清潔阿姐每日都要幫你執晒四圍啲垃圾。佢仲要額外幫你抹枱同地下，因為你成日喺個位度燉湯同燜燒牛肉，啲汁滴到枱面同地氈都「黐漉漉」。個位咁污糟我哋又同邊個計？而你帶返工啲私人嘢已經愈嚟愈多，你隔籬位個同事俾你啲毛公仔、燜燒鍋、耳環盒同Gel甲機霸咗半張枱。」
最後，Ka姐遞咗張數紙俾阿珊話：「如果要認真同你計，就唔係只講點慳啲清潔費同滅蚤費啦！你將屋企個廚房、睡房同客廳搬咗返公司，公司應該收你租，包埋你水電又點話吖？」