大肚婆阿芝搭地鐵去開會，有個小鮮肉唔覺意同阿芝有眼神接觸，即刻好似見到恐怖分子咁「武裝」自己，嗱嗱臨喺背囊攞耳筒同手機出嚟，扮聽歌打機。小鮮肉隔籬個OL，本來畫緊眼線，眼尾望到阿芝，即刻合埋眼瞓覺。坐關愛座嘅阿婆唔抵得，好大聲話：「陀B好辛苦㗎，仲要攞住個咁重嘅袋。個個唔讓位俾你，我讓俾你。」
阿芝又好大聲話「婆婆多謝晒，唔使喇，5個月啫，我企得嘅，我慣冇人讓位嘅啦。」就算佢兩個咁大聲，一秒進入深層睡眠嘅OL，同埋沉醉喺聽歌打機嘅小鮮肉，早已成為低頭族，佢哋頭頂又無天線，完全收唔到囉。
未幾，附近有個西裝大叔起身，阿婆同阿芝即刻為之感動，呢啲咪Man囉。點知西裝大叔臨走放低一句：「俾你坐，我而家落車！唔該借借。」阿芝一返到公司，就鬧爆啲人扮打機煲劇唔想讓位，而肯讓果個都係因為要落車。
阿芝唔明，呢班偽低頭族有幾委屈，佢哋根本唔想打機煲劇，搭地鐵最好係放空，雙眼冇焦點「馬明呆」直至到站。但係一有位坐，成件事就唔同咗，好似突然中咗金多寶咁，雖千萬人，我中矣！暴發喎，享受多一陣得一陣啦！邊個肯斷捨離呀？就算中咗獎積福捐啲俾慈善機構，都係自己買樓、買車、去完豪華旅行之後先捐啦，所以大叔坐到落車前最後3秒，先讓位俾阿芝係合情合理。
有時遇著一家大細，當個老人家得到人哋讓位，佢坐一陣，就起身叫佢個孫坐，佢個孫又鬼咁精靈生猛。讓位果個唔揼心呀，感覺好似俾補藥黨家族呃晒啲橫財咁呀！
明知低頭對條頸好傷，都要做，為咩呀？咪為咗保住個位囉。如果傷完自己，仲保唔到個位，咁做人同條鹹魚有咩分別？BTW，我哋返工咪又係為咗保住個位，做偽低頭族。