依家仲係新年，梗係祝大家來年事事順心，身體健康。
不過好打得就流年不利。新年之前，佢地搞到香港各行各業各界別老中青齊齊發火。我從來好少睇特首評分之走勢，反而係多睇佢地支持率。本周初好打得支持率回番些少到35%，比之前32%好啲。但係個形態係一浪低過一浪。咁搞法，佢只係多跌5%就跌到落30%之生死線。咁除非佢唔介意一直碌到底，否則上面就係評估下，究竟係搶救佢，定係由得佢不斷咁樣衰下跌倒，提早預備下一任特首。
有睇開本欄都知，我一直用過往數據講過，特首民望生死線係30%，如果低過呢個數值，歷史上講畀大家知，呢位特首就要下台。一件不留。無論你政治有幾正確都冇用。上一屆香江領導比好打得更加同北京站得近，跟隊最貼，從無離隊，一樣無得連任。如果呢位阿姐一路好打得下去，隨時提早出局。各位朋友，買定花生，睇下有乜嘢人，會突然標出來沙圈熱身搞嘢了。最緊要係睇清楚極左，即係上屆特首之支持者幾時攻擊好打得施政。只要佢地吹起號角，唔該大家即刻撲去超市買花生了。
信焉？
下個月最大單係美中關係，即係中美兩國會唔會傾掂數。如果只係追住侵侵嘅社交媒體之放話(圖)，一時又話得，一時又話唔得，像霧又像花。不過之前我都提過，唔應該只係留意侵侵，而係要睇侵侵隔籬嘅鬍鬚佬博爾頓同埋納瓦羅。直到交稿之前，仲未見到佢地有任何鬆口之跡象。之前美帝之八卦友有講過，白宮一啲決策，響開會時，明明侵侵口氣都有放軟，點知鬍鬚佬博爾頓開聲，侵侵即刻聽晒佢話。咁學足佢老細，博爾頓之推特日日都會發功。佢近日都有講到強國。係乜嘢？佢話佢同美帝工業家會面，傾到強國非法出口強力止痛劑芬太尼(梗係走私啦)搞到美帝濫藥者越來越多。即係話，美帝依家除了出招貿易，遲啲玩強國出口芬太尼？
台灣政局千變萬化。藍營南部大老golden ping居然會出山，話要選總統，咁即係擺明要同一早要出戰之朱立倫拗手瓜。Golden Ping有名你叫，有金有平嘛，即係好多金，就有好多資源啦！好和平，即係同好多地區朋友稱兄道弟啦。佢出選就真係打亂晒好多藍營大老之部署。金平叔早輪爆料，講到立倫上次點樣用計謀，迫走洪秀柱自己再上位參選，而原本想出選之金平叔，都畀立倫過了一棟，結果就冇得參選，侷住支持立倫。咁如果藍營金平叔真係玩真的參選，就真係會顛覆晒個選舉。老實，金平叔已經年紀唔細，七張幾仲要去選，似乎唔係為錢，係為啖氣多啲。藍營點樣擺平？唔擺平的話隨時會輸畀綠營甚至係柯Ｐ！
都係呢句：留意委內瑞拉！
倫敦大學亞非研究學院法律系博士