係，今次個topic係開得老套咗少少。過咗個肥年，由團年飯食到開年，成個新年nonstop咁食法，囤積咗唔少脂肪，但呢啲都係幸福嘅脂肪。
人大咗，過時過節真係唔想再出去同人逼，除咗等停車場泊位等位等上菜等埋單等等等不斷等之外，新年期間亦少不免加加加。我明我明，我有屋企你都有屋企，新年要開工，份糧俾多少少，咁埋單當然要俾貴少少，非常合理。不過，有得俾我揀，我都係寧願做一個星期宅女，黐實屋企做番個皇帝女皇帝孫。雖然每年都係食嗰啲餸：茄汁大蝦、雞、髮菜蠔豉同大魚大肉，仲有碗足料靚湯；但依然好期待齊人食飯嘅熱鬧同快樂。你一句，我一句，嘈到不得了！掛住笑，連啲餸菜都凍晒……其實食咩又有咩所謂，最重要係同邊個一齊食之嘛！(講完自己都打咗個冷震，係好老套但我鍾意，祝各位新年快樂！送上愛貓「唔鋸」合照一張，嘿！)
