身邊總有一位朋友同你非親非故、毫無血緣關係，年紀同你不相上下，但往往比你親生媽咪更嘮叨。
媽咪型朋友經常勸你唔好咁大使，同佢行街每拎起一樣嘢想買，佢都總會搵到理由叫你放低。佢最喜歡嘅一句台詞係「咦，唔好喺度買啦，上網大把，平好多㗎！」媽咪型朋友非常了解你，包括你懵懂嘅一面，亦經常借機同你開玩笑。但每當你喺外面被誤解、被欺負，佢知道之後會仲嬲過你。雖然經常勸你多一事不如少一事，但佢自己總會替你出頭。媽咪型朋友過目不忘，有啲事你只係同佢輕輕提過一次，甚至事後自己再醒唔起，佢卻總會喺出奇不意嘅時候記起。有時仲會半夜三更send條link問你係咪想買某樣嘢、仲想唔想去某個地方。你每次去旅行總係冇心肝，喺當地飲飽食醉過後好似冇事發生一樣，但媽咪型朋友去到邊都會諗起你。唔理件手信打唔打得爛、食唔食得，佢決定咗就一定會帶返嚟俾你。每次遇到新對象，你得意忘形、為愛情而盲目嘅時候，媽咪型朋友總會苦口婆心勸你睇定啲先。到你發現遇人不淑，同另一半關係出現問題，佢會仲傷心過你，甚至同你喊埋一份。
我身邊都有一位媽咪型朋友。大家由仲係妹妹仔嘅時候就認識，互相見證住對方成長、談戀愛、結婚……最近佢仲真正成為咗位媽媽𠻹。我都想趁呢個機會為佢一家送上祝福。有其母必有其女，Ellie必定會同媽咪一樣又靚又善良，喺幸福同愛中成長。
