自家製京風冷豆腐 $48
自家製免治雞肉棒盛盒 $108
我認，我真係一個好鍾意食日本嘢嘅港女。日式居酒屋FireBird，主打由日本走地雞阿波尾雞肉製作嘅雞肉串燒同日本產地直送嘅刺身。由於舖仔細細，得五十幾個位(好似)，幾乎晚晚爆場。阿波尾雞肉串燒，堅係雞有雞味，雖然吸引，但串燒quota我永遠都會留俾自家製免治雞肉棒。作為雞軟骨lover嘅我，一試便知龍與鳳！上年3月開嗰陣食過，覺得個免治雞肉打得太軟腍，口感麻麻，於是厚住面皮同師傅反映。當時佢話會再adjust下，以為佢敷衍我啦，點不知上次去食真係有唔同，雞肉彈牙，雞軟骨大小適中又唔會梗牙，係佢喇！係日本嘅味道！新口味分別加埋燒明太子、芥末蛋黃醬同青蔥盛配日本蛋黃(至愛大量蔥！)，唔使講，最愛一定係明太子，分量大方，辣辣哋又鹹鹹哋真係好過癮！
另一必食推介係自家製京風冷豆腐，由京都空運到港嘅豆乳、每日喺舖頭新鮮製作，口感滑溜，豆味濃郁，忍唔住會食下食下食晒成碟！豆腐呢家嘢新唔新鮮真係一食就知，收你$48又要keep住個品質每日製作，真係唔係hea你，屬誠意之選。
FireBird 2386 5218