我知，咁樣寫咗出嚟，個menu已經唔再hidden！但我總不能做自私精！梗係要將Edwin師傅嘅好嘢同大家分享！
佢嘅拿手菜式有太多，有機會再同大家一一分享，但要大大力讚嘅係佢貼心為大家預備嘅爵士湯。上星期氣溫驟降，天氣又乾又凍，Edwin師傅一拎個爵士湯出嚟，引得大家「嘩」然！佢所煲嘅係鄧肇堅爵士版本，以蜜瓜打成蓉，加入蜜瓜皮與豬月展、三黃雞、唐排、雞腳、沙參、玉竹、螺頭、花膠同果皮同燉4個鐘，上枱前拎走蜜瓜皮。湯水清甜滋潤，暖身又窩心。
另一個坊間流傳嘅爵士湯，係以木瓜取代蜜瓜嘅邵逸夫爵士版本，係不一樣嘅清甜。兩款爵士湯，同樣被認為係兩位爵士嘅其中一個養生秘笈。足料到咁，當然養生！
國金軒
尖沙咀The Mira Hong Kong 3樓
2315 5222