韓國米酒拼盤 $138
有一年去首爾旅行，去咗間排長龍燒肉店(唔記得叫咩名)，諗住融入下當地，叫店員推介番支韓國米酒送下飯，點知又濃又嗆喉，我好廢咁飲咗兩啖就放棄咗。
早前同朋友M去尖沙咀嘅韓式米酒小館 Ssal Bori Ssal ，朋友話韓國人係鍾意用米酒送啲煎炸或辣嘅嘢食，餐廳仲特別推介咗個韓國米酒拼盤，一次過可以試勻6款Makgeolli。唔同濃淡度同甜度嘅米酒，等大家可以試真啲先再order！我自己就最鍾意栗子生米酒，入口較稠身濃厚，甜度高，感覺有啲似栗子露糖水呢！
Makgeolli主要分為生熟兩款，由於生米酒保存期只有一個月，所以一般韓式餐廳唔會入太多款式同味。而 Ssal Bori Ssal 主打米酒，吸引唔少愛酒之人捧場，因此特別引入多款生米酒。佢哋亦有一款獨家嘅「福順都家」，係以低溫發酵嘅手工製米酒，包裝平平無奇，但米香濃郁，而且有好似香檳般細滑嘅泡沫，非常易入口。呢款酒係佢哋獨家代理，香港其他韓國餐廳想入貨都要經佢哋攞貨，巴閉得佢！聽講南韓政府仲會用佢招待國家級來賓添！
Ssal Bori Ssal 尖沙咀金巴利道78號金輝閣地下B舖