![](https://cdn.am730.com.hk/s3fs-public/styles/article_image/public/news_image/1557868147_Cz.jpg?itok=vRqQzzfg)
同香港好多小朋友一樣,阿安個仔都患咗濕疹,而且醫極都唔斷尾。阿安為咗個寶貝仔,時不時要請假去睇名醫,佢老闆見到咁就俾說話阿安聽,叫佢不如全職睇住個仔,搞到阿安鬼咁大壓力,怕隨時連份工都無埋,後尾連自己都有埋濕疹,認真濕滯。自己有濕疹唔醫,阿仔都要醫,但睇一次名醫,閒閒地成二千蚊,冇咗份工點俾醫藥費呀?阿安唯有帶完阿仔睇名醫,拿拿臨返到屋企繼續做公司嘢。
叫得名醫都有3個共通點:好貴、好難約,同好耐都醫唔好。最近阿安帶阿仔轉睇另一個皮膚科名醫,佢哋去到間裝修好靚嘅診所,等咗成個鐘先見到醫生。一坐低,個醫生用接受電視訪問嘅温柔語氣問:「你咩唔舒服呀?」期間佢對眼全程無離開過電腦個mon。阿安話:「我個仔啲濕疹好犀利……」都未講完名醫就打斷:「我聽日下晝可以幫佢做脫斑,你叫佢早啲嚟搽定Gel。」阿安嚇到呆咗,以為名醫忙到黐咗線,當名醫轉身望住個護士,阿安先知佢原來係吩咐緊護士幫前一個病人約期。
跟住,名醫又望住個電腦話:「天氣都對濕疹有影響,佢呢排會辛苦啲。」雖然名醫冇望住阿安,但阿安諗名醫呢句應該係同佢講,而護士係呢一刻亦插嘴:「你聽日3點仲有個patient!」名醫話:「應該好快睇完。」名醫繼續話:「嗱,我開啲藥膏俾佢搽兩個星期,你哋出去同護士約期啦。」阿安完全唔知名醫係同護士講、同自己講定同阿仔講,好亂呀!
名醫繼續好温柔咁話:「你唔好俾囝囝𢯎隻手仔,愈𢯎愈痕㗎。」吓?阿仔係隻腳有濕疹,點解名醫叫佢唔好𢯎隻手?唔通痛有原痛點,痕一定有原痕點,腳痕其實係手痕,咁博大精深嘅醫術,加埋明星咁嘅氣派,仲送埋幾支潤膚露俾你,唔使你去藥房買,只係收二千蚊咋,仲唔夠抵?睇完名醫,阿安又要拿拿臨趕返屋企繼續做公司嘢,唔係又點負擔得起睇名醫呀?